रविवार, 11 ऑक्टोबर 2026
शिवाजी पार्क परिसरात पोलिसांचा मोठा बंदोबस्त (Photo - X)
मुख्य निवडणूक आयुक्त ज्ञानेश कुमार यांच्या राजीन्याच्या मागणीसाठी कॉकरोच जनता पार्टी आणि काही विद्यार्थी संघटनांकडून दिल्लीत जोरदार आंदोलन पार पाडले जात आहे. याचे पडसाद कालपासूनच मुंबईतदेखील पाहायला मिळत आहे. दिल्ली आणि मुंबईत पोलिसांकडून धरपकड चालू असून आंदोलकांच्या अभिव्यक्ती स्वातंत्र्यावर प्रश्नचिन्ह निर्माण झाले आहे. काल मोठ्या प्रमाणात CJP चे पदाधिकारी, राजकीय नेते आणि इतर आंदोलकांना पोलिसांनी ताब्यात घेतल्यानंतर आजही पोलिसांकडून तोच कित्ता गिरवला जात आहे. यावरूनच मोठ्या प्रमाणात राजकीय आणि सामाजिक वर्तुळात संताप व्यक्त करण्यात येत असून चर्चाना उधाण आले आहे. (CJP Mumbai Protest)
दादर येथील छत्रपती शिवाजी महाराज पार्क परिसरात आंदोलनाच्या पार्श्वभूमीवर मुंबई पोलिसांनी मोठा बंदोबस्त तैनात केला आहे. परिसराकडे जाणाऱ्या मार्गांवर बॅरिकेडिंग करण्यात आले असून अनेकांना पोलिसांनी ताब्यात घेतल्याची माहिती समोर आली आहे. सामाजिक कार्यकर्त्या अंजली दमानिया यांनाही पोलिसांनी ताब्यात घेतले. या कारवाईवरून मनसे नेते संदीप देशपांडे यांनी पोलिसांच्या भूमिकेवर प्रश्न उपस्थित करत गंभीर आरोप केले आहेत.
केंद्रीय मुख्य निवडणूक आयुक्त ज्ञानेश कुमार यांच्या राजीनाम्याची मागणी आणि CJP समर्थकांवरील कारवाईच्या निषेधार्थ मुंबईत आंदोलनाची हाक देण्यात आली होती. या पार्श्वभूमीवर शिवाजी पार्क परिसरात पोलिसांनी सुरक्षाव्यवस्था वाढवली. महत्त्वाच्या मार्गांवर बॅरिकेडिंग करण्यात आले असून परिसरात येणाऱ्या नागरिकांची चौकशी केली जात असल्याचे वृत्त आहे.
काही नागरिकांनी आपण आंदोलक नसून कामावरून घरी जात असल्याचे किंवा परिसरात फिरण्यासाठी आल्याचे सांगितले. तरीही पोलिसांनी आपल्याला ताब्यात घेतल्याचा दावा काही तरुणांनी केला आहे. दरम्यान, अंजली दमानिया यांनाही आंदोलनस्थळी पोहोचण्याच्या प्रयत्नादरम्यान ताब्यात घेण्यात आल्याचे वृत्त समोर आले आहे.
या कारवाईवरून मनसे नेते संदीप देशपांडे यांनी पोलिसांवर गंभीर आरोप केले आहेत. त्यांच्या दाव्यानुसार, शिवाजी पार्क पोलीस ठाण्यात भाजपच्या एका पदाधिकाऱ्याने स्थानिकांची बैठक घेतली होती. या बैठकीत आंदोलकांना अडवण्यास आणि त्यांना विरोध करण्यास सांगण्यात आल्याचा आरोप देशपांडे यांनी केला.
आंदोलकांच्या अंगावर जाण्यास सांगून त्याबदल्यात संरक्षण देण्याचे आश्वासन देण्यात आल्याचा दावाही त्यांनी केला. या आरोपांचे पुरावे आपल्याकडे असल्याचे देशपांडे यांनी म्हटले आहे. त्यामुळे मुंबईत संघर्ष घडवून आणण्याचा प्रयत्न होता का, असा सवाल त्यांनी उपस्थित केला.
मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी CJP ने दिल्लीत आंदोलन पुकारले होते. या आंदोलनाच्या पार्श्वभूमीवर पक्षाचे संस्थापक अभिजीत दिपके यांच्यासह काही कार्यकर्त्यांना पोलिसांनी ताब्यात घेतल्याचे वृत्त समोर आले होते. त्यानंतर मुंबईतही आंदोलनाची घोषणा करण्यात आली.
मुंबईतील शिवाजी पार्क परिसरातील बंदोबस्त, आंदोलकांना ताब्यात घेण्याची कारवाई आणि संदीप देशपांडे यांनी केलेले आरोप यामुळे या प्रकरणाला राजकीय वळण मिळाले आहे. पोलिसांची कारवाई नेमकी कोणत्या कारणांमुळे करण्यात आली आणि देशपांडे यांच्या आरोपांबाबत प्रशासन काय भूमिका घेते, याकडे आता लक्ष लागले आहे.
