मुंबई : जुन्या मुंबई-पुणे महामार्गावर पुन्हा एकदा भीषण अपघात झाला आहे. काल सकाळी सव्वा आठ वाजण्याच्या सुमारास हा अपघात झाला आहे. भरधाव कंटेनर पलटी झाला आणि २० फूट दूर फरफटत गेला. या अपघातात कंटेनरने रिक्षाला जोरदार धडक दिली. हा भीषण अपघात तेथील सीसीटीव्हीत कैद झाला आहे.
जुन्या पुणे मुंबई महामार्गावर सकाळी सव्वा आठ वाजता खंडाळा पोलीस प्रशिक्षण केंद्र साठे मिसळजवळ पुण्यावरून मुंबईकडे अतिवेगाने जाणारा कंटेनर चालकाचा ताबा सुटल्याने पलटी झाला. त्याच वेळेस खंडाळ्यातून लोणावळच्या दिशेने जाणाऱ्या पॅसेंजर रिक्षाला या कंटेनरची धडक बसली. या अपघाताची दृश्य सीसीटीव्ही कॅमेऱ्यात कैद झाली आहेत.
पुणे मुंबई महामार्गावरील लेन कटिंग करत हा कंटेनर २० फूट घसरून पलटी झाला. यावेळी मोठा आवाज झाला. या अपघातात रिक्षा प्रवासी गंभीर जखमी झाले आहेत. त्यांना लोणावळ्यातील परमार हॉस्पिटलमध्ये उपचारासाठी दाखल करण्यात आलं आहे. तर कंटेनर चालक सुखरूप बचावला आहे. अपघाताची माहिती मिळताच घटनास्थळी स्थानिक दुकानदार आणि लोणावळा शहर पोलीस दाखल झाले. अपघातग्रस्त वाहने बाजूला घेण्यात आली आहेत.
.png "Videos"){kind=small}
