बुधवार, 21 ऑक्टोबर 2026
संग्रहित फोटो
पुणे : गणेश विसर्जन सोहळ्यानिमित्त शनिवारी (०६ सप्टेंबर) वाहतूक पोलिसांनी वाहतूकीत मोठा बदल केला आहे. या वाहतूक बदलाचे आदेश जारी करण्यात आले असून, एकूण १७ रस्ते वाहतुकीसाठी बंद ठेवले जाणार आहेत. या रस्त्यावर शनिवारी सकाळी सातपासून दुसऱ्या दिवशी मिरवणूक संपेपर्यंत वाहतूक बंद राहणार आहे. त्यामुळे वाहनचालकांनी पर्यायी रस्त्याचा वापर करावा, असे आवाहन वाहतूक पोलिसांनी केले आहे. विसर्जन मिरवणुकीनिमित्त पोलिसांनी नियोजन केले आहे. विसर्जन सोहळ्यासाठी वाहतूक शाखेतील अधिकाऱ्यांसह सातशे पोलिस कर्मचारी व होमगार्ड वाहतूक नियोजन करणार आहेत. वाहतुकीसाठी बंद असणारे रस्ते मिरवणुकीची सांगता झाल्यानंतर वाहतुकीसाठी खुले करून दिले जाणार आहेत.
वाहतुकीसाठी बंद असणारे रस्ते पुढीलप्रमाणे
शिवाजी रस्ता, लक्ष्मी रस्ता, बाजीराव रस्ता, कुमठेकर रस्ता, गणेश रस्ता, टिळक रस्ता, केळकर रस्ता, शास्त्री रस्ता, जंगली महाराज रस्ता (झाशीची राणी चौक ते खंडुजीबाबा चौक), कर्वे रस्ता (नळस्टॉप चौक ते खंडुजीबाबा चौक), ना. गोपाळ कृष्ण गोखले रस्ता (खंडुजीबाबा चौक ते फर्ग्युसन महाविद्यालय प्रवेशद्वार), भांडारकर रस्ता (पीवायसी जिमखाना ते गोखले स्मारक चौक), पुणे-सातारा रस्ता (व्होल्गा चौक ते जेधे चौक), सोलापूर रस्ता (ढोले पाटील चौक-सेव्हन लव्हज चौक ते जेधे चौक), प्रभात रस्ता (डेक्कन पोलिस ठाणे; तसेच शेलारमामा चौक), बगाडे रस्ता (सोन्या मारुती चौक ते फडके हौद चौक), गुरुनानक रस्ता (देवजीबाबा चौक ते हमजेखान चौक ते गोविंद हलवाई चौक).
वाहतुकीसाठी वर्तुळाकार मार्ग
विसर्जन सोहळ्यानिमित्त वाहतूक पोलिसांनी पर्यायी वर्तुळाकार मार्ग तयार केला आहे. शहराबाहेर पडण्यासाठी वाहनचालकांनी पर्यायी वर्तुळाकार मार्गाचा वापर करावा, असे आवाहन वाहतूक पोलिसांनी केले आहे. वर्तुळाकार मार्ग पुढीलप्रमाणे- कर्वे रस्ता, नळस्टॉप चौक, विधी महाविद्यालय रस्ता, सेनापती बापट रस्ता, गणेशखिंड रस्ता, सिमला ऑफिस चौक, संचेती हॉस्पिटल, अभियांत्रिकी महाविद्यालय, शाहीर अमर शेख चौक, मालधक्का चौक, बोल्हाई चौक, नरपतगिरी चौक, नेहरू रस्ता, संत कवीर पोलिस चौकी, सेव्हन लव्हज चौक, वखार महामंडळ चौक, मार्केट यार्ड, शिवनेरी रस्ता, सातारा रस्ता, लक्ष्मीनारायण चित्रपटगृह, मित्रमंडळ चौक, सिंहगड रस्ता, शास्त्री रस्ता, सेनादत्त पोलिस चौकी, म्हात्रे पूल, नळस्टॉप चौक.
