कोरोनाच्या लशीसाठी ३० माकडांवर प्रयोग

पुण्यातील राष्ट्रीय विषाणू विज्ञान संस्थेचे नियोजन पुणे : कोरोना विषाणूवर लस विकसित करण्यासाठी संशोधन हाती घेण्यात आले आहे. या प्रकल्पासाठी पुण्याच्या राष्ट्रीय विषाणू विज्ञान संस्थेला ३० माकडांची

पुण्यातील राष्ट्रीय विषाणू विज्ञान संस्थेचे नियोजन

पुणे : कोरोना विषाणूवर लस विकसित करण्यासाठी संशोधन हाती घेण्यात आले आहे. या प्रकल्पासाठी पुण्याच्या राष्ट्रीय विषाणू विज्ञान संस्थेला ३० माकडांची आवश्‍यकता आहे. ही माकडे राज्याच्या हद्दीतील घेण्यात येणार असून, लशीचा सर्वप्रथम प्रयोग त्यांच्यावर होणार आहे. यासाठी ३० माकडे तत्काळ उपलब्ध करण्याचे निर्देश वनमंत्री संजय राठोड यांनी दिले आहे.

करोना प्रादुर्भाव व परिस्थितीचे गांभीर्य लक्षात घेता या प्रकल्पास तातडीने परवानगी देण्याबाबत राज्याचे प्रधान मुख्य वनसंरक्षक (वन्यजीव) यांनी या कामास मान्यता देण्याची शिफारस शासनास केली आहे.

अनुभवी मनुष्यबळामार्फत या माकडांना पकडणे, त्यांना कुशलतेने हाताळणे, त्यांना सुरक्षितपणे बाळगणे, माकडांना तसेच परिसरातील इतर वन्यप्राण्यांना इजा, त्यांचा दैनंदिन जीवनक्रम विस्कळीत न होऊ देणे, प्रकल्पाचा व्यापारी तत्वावर उपयोग न करणे आदी अटी शर्तींच्या अधीन राहून ही मान्यता देण्यात आली आहे. याबाबत राष्ट्रीय विषाणू विज्ञान संस्थेच्या अधिकाऱ्यांशी संपर्क साधण्याचा प्रयत्न केला असता, तो होऊ शकला नाही.