नक्की आपण खातोय काय? Pune शहरात ९ हजार किलो पनीर, ४४० किलो खवा अन्…; FDA ची धडक कारवाई

बावधन, कसबा पेठ आणि बिबवेवाडी परिसरात अनियंत्रित तापमानात पनीर व खव्याची वाहतूक आणि साठवणूक तसेच खुल्या स्वरूपात विक्री होत असल्याचे आढळले. त्यामुळे ९ हजार किलो पनीर आणि ४४० किलो खवा जप्त करण्यात आला. हे पदार्थ मानवी सेवनासाठी असुरक्षित असण्याचा संशय असून, त्याबाबत पुढील कार्यवाही सुरू आहे.

मार्केट यार्ड येथील मे. ३डी मसाले अँड ड्रायफ्रूट्स या आस्थापनेत तपासणीदरम्यान चहा, फ्लेवर्ड ड्रिंक कॉन्सन्ट्रेटसह एकूण ७७.७५ किलो अन्नपदार्थ जप्त करण्यात आले. या पदार्थांचा दर्जा निकृष्ट व ते असुरक्षित असल्याचा तसेच लेबलिंगमध्ये त्रुटी असल्याचा संशय आहे. आस्थापनेत स्वच्छतेच्या नियमांचेही उल्लंघन आढळले. दरम्यान, पौड रोडवरील चांदणी चौक परिसरातील सूर्यम एंटरप्रायजेस येथून विविध प्रकारच्या खाद्यतेलाचा ९ हजार ८८८ लिटर साठा जप्त करण्यात आला. या सर्व प्रकरणांत अन्नसुरक्षा नियमांनुसार पुढील कार्यवाही सुरू आहे.

मिथेनॉलप्रकरणी पुणे विभागातील ४३ कंपन्यांवर कारवाई
विषारी दारूमुळे १९ जणांचा मृत्यू झाल्यानंतर अन्न व औषध प्रशासनाने (एफडीए) मिथेनॉलशी संबंधित कंपन्यांवर कारवाईचा बडगा उगारला आहे. पुणे विभागातील मिथेनॉलशी संबंधित सर्व १०२ परवानाधारक कंपन्यांची तपासणी पूर्ण करण्यात आली असून, नियमांचे उल्लंघन आढळलेल्या ४३ कंपन्यांवर कारवाई करण्यात आली आहे. यामध्ये २८ कंपन्यांचे परवाने निलंबित, तर १५ कंपन्यांचे परवाने रद्द करण्यात आले आहेत.

विषारी दारूच्या घटनेनंतर राज्यभर मिथेनॉलशी संबंधित कंपन्यांची तपासणी मोहीम हाती घेण्यात आली. राज्यात मिथेनॉलशी संबंधित सर्वाधिक कंपन्या पुणे विभागात असल्याने गेल्या चार महिन्यांपासून या कंपन्यांच्या कामकाजाची तपासणी करण्यात येत आहे. त्यानुसार विभागातील सर्व १०२ परवानाधारकांची तपासणी पूर्ण झाली आहे.

मिथेनॉलचा साठा, खरेदी-विक्री, वापर आणि हाताळणीसाठी आधीपासूनच नियम निश्चित आहेत. त्यामुळे नवीन नियम करण्याऐवजी विद्यमान नियमांची प्रभावी अंमलबजावणी करून उल्लंघन करणाऱ्यांवर कारवाई करण्याला एफडीएकडून प्राधान्य दिले जात आहे. परवाना निलंबित करणे आणि परवाना रद्द करणे या स्वतंत्र प्रशासकीय कारवाया आहेत. तपासणी पूर्ण झाली असली तरी कंपन्यांकडून नियमांचे सातत्याने पालन होत आहे की नाही, यावर प्रशासनाचे लक्ष राहणार आहे. मिथेनॉलचा गैरवापर रोखण्यासाठी नियमित तपासणी आणि नियमभंग झाल्यास कारवाई सुरूच राहणार असल्याचे एफडीएचे पुणे विभागाचे सहायक आयुक्त गिरीश हुकरे यांनी सांगितले.