दुसऱ्या फिशर रँडम बुद्धीबळ960; रॅपिड बुद्धीबळ स्पर्धेत 58 खेळाडूंचा सहभाग

पुणे जिल्हा बुद्धीबळ सर्कल यांच्या मान्यतेखाली फिशर रॅंडम बुद्धीबळ स्पर्धा आयोजित करण्यात येणार आहे. सिम्बायोसिस स्पोर्ट्स सेंटरमध्ये ही स्पर्धा आयोजित करण्यात येणार आहे. चेसचा ग्रॅंड मास्टर अभिजित कुंटे हस्ते या स्पर्धेचे उद्घाटन होणार आहे.

पुणे : बुद्धीबळ क्रीडा ट्रस्ट यांच्या वतीने आयोजित व पुणे जिल्हा बुद्धीबळ सर्कल (पीडीसीसी) यांच्या मान्यतेखाली होत असलेल्या दुसऱ्या फिशर रँडम (बुद्धिबळ960) रॅपिड बुद्धीबळ स्पर्धेत 58 खेळाडूंनी आपला सहभाग नोंदवला आहे. ही स्पर्धा प्रभात रोड येथील सिम्बायोसिस स्पोर्ट्स सेंटर या ठिकाणी 21 जुलै 2024 रोजी रंगणार आहे.

सात किंवा आठ फेऱ्यांमध्ये खेळविण्यात येणार स्पर्धा

बुद्धीबळ क्रीडा ट्रस्टचे व्यवस्थापकीय विश्वस्त प्रकाश कुंटे यांनी सांगितले की, स्पर्धेत एकूण 21,000 रुपयांची पारितोषिके देण्यात येणार आहेत. तसेच, ही स्पर्धा स्विस लीग पद्धतीने सात किंवा आठ फेऱ्यांमध्ये खेळविण्यात येणार आहे. ही स्पर्धा खुल्या गटात होणार आहे.

ग्रॅंडमास्टर अभिजित कुंटे हस्ते होणार उद्घाटन

स्पर्धेत मानांकित खेळाडूंमध्ये आयएम अभिषेक केळकर(2143), प्रथमेश शेरला(1962), विकास शर्मा(1952), विरेश शरणार्थी(1898), ओम लामकाने(1873), अक्षज पाटील(1861), आर्यन सिंगला(1845), सौरभ म्हामने(1830), श्लोक शरणार्थी(1826) हे खेळाडू आपले कौशल्य पणाला लावणार आहेत. आयए नितीन शेणवी चीफ आरबीटर , तर आयए विनिता क्षोत्री डेप्युटी चीफ आरबीटर म्हणून काम पाहणार आहेत. स्पर्धेचे उदघाटन ग्रँडमास्टर अभिजीत कुंटे यांच्या हस्ते 21 जुलै 2024 सकाळी 9 वाजता होणार असून पहिल्या फेरीस9.15 वाजता प्रारंभ होणार आहे. याच दिवशी गुरुपौर्णिमेनिमित्त पुण्यातील बुद्धिबळ प्रशिक्षक केतन खैरे व अभिजित जोशी यांना बुद्धिबळ क्रीडा ट्रस्ट द्वारा सन्मानित करण्यात येणार आहे.