मंगळवार, 20 ऑक्टोबर 2026
Raigad News: रायगडच्या विकासासाठी ५९४ कोटींचा निधी; मार्चअखेर १०० टक्के खर्चाचे पालकमंत्र्यांचे निर्देश
निधीचे वितरण आणि प्रत्यक्ष विकासकामांची पूर्तता यामध्ये अंतर राहू नये, यासाठी प्रशासनाने नियोजनबद्ध पद्धतीने काम करावे, अशी अपेक्षा या बैठकीत व्यक्त करण्यात आली. मंजूर कामांच्या निविदा वेळेत पूर्ण करून प्रशासकीय व तांत्रिक मान्यता तातडीने देण्याचे निर्देशही पालकमंत्र्यांनी दिले. (फोटो सौजन्य – AI Created)
जिल्ह्यातील रस्ते, पिण्याच्या पाण्याची व्यवस्था, ग्रामीण विद्युतीकरण आणि सांडपाणी व्यवस्थापनाची कामे प्राधान्याने पूर्ण करावीत, असे गोगावले यांनी सांगितले. प्राथमिक आरोग्य केंद्रांमधील सुविधा सुधारणे, औषधांचा पुरेसा पुरवठा सुनिश्चित करणे आणि जिल्हा परिषद शाळांमधील भौतिक सुविधांसह शिक्षकांच्या उपस्थितीवर लक्ष देण्याचे निर्देश देण्यात आले. शेतक-यांसाठीच्या योजना, बंधारे, गाळमुक्त तलाव आणि सिंचन सुविधांची कामे वेळेत पूर्ण करावीत. जिल्ह्यातील पर्यटनाला चालना देणाऱ्या पायाभूत सुविधा विकसित करण्याबरोबरच तरुणांसाठी स्वयंरोजगाराच्या योजनांची प्रभावी अंमलबजावणी करावी, असेही त्यांनी स्पष्ट केले.
दरम्यान, राज्यातील दुष्काळी परिस्थितीच्या पार्श्वभूमीवर पाणीटंचाई टाळण्यासाठी तातडीच्या उपाययोजना राबविणे, नागरिकांना नियमित पाणीपुरवठा करणे आणि ग्रामीण भागातील पशुधनासाठी पाणी व चारा उपलब्ध करून देण्यावर भर देण्यात आला आहे. आता ५९४ कोटींच्या विकासनिध्याचा विनियोग किती वेगाने होतो आणि त्यातून रायगडच्या ग्रामीण भागासह शहरी क्षेत्रातील मूलभूत प्रश्न कितपत सुटतात, याकडे जिल्हावासीयांचे लक्ष लागले आहे.
विकासकामांचा दर्जा राखण्यासाठी अधिकाऱ्यांनी नियमित प्रत्यक्ष पाहणी करावी. वनविभाग, सार्वजनिक बांधकाम विभाग, महावितरण आणि महसूल विभाग यांच्यातील समन्वयाच्या अभावामुळे कोणतेही काम रखडता कामा नये. आमदार, खासदार आणि स्थानिक लोकप्रतिनिधीनी सुचवलेल्या महत्त्वाच्या कामांना प्राधान्य देऊन ती वेळेत पूर्ण करावीत. नागरिकांच्या तक्रारीचे स्थानिक पातळीवरच जलद निवारण करण्यासाठी विशेष यंत्रणा राबवावी. – भरत गोगावले, पालकमंत्री
