मुंबई : अभिनेता सुशांत सिंह राजपूतच्या (Sushant Singh Rajput Case) मृत्यूचा संबंध ड्रग्स प्रकरणाशी जोडलेला आहे. अभिनेत्री रिया चक्रवर्ती (Rhea Chakroborty) आणि तिचा भाऊ शौविक (Showik) यांनी ड्रग्स पेडलर्सकडून (Drugs) अनेकदा गांजा खरेदी करून सुशांतला दिला असल्याचे केंद्रींय अमली पदार्थ नियंत्रण विभागाने (एनसीबी) (NCB) विशेष एनडीपीएस न्यायालयात दिलेल्या आरोपांचा मसूद्यात नमूद केले आहे.
[read_also content=”कुटुंब नियोजनात पुरुषांचे प्रमाण अत्यल्पच, जव्हार तालुक्यात महिलांच्या शस्त्रक्रिया करण्यावर जोर https://www.navarashtra.com/maharashtra/male-ration-of-family-planning-in-jawhar-is-very-less-nrsr-303551.html”]
बॉलीवूड अभिनेता सुशांतसिह राजपूतने १४ जून २०२० रोजी घरात आत्महत्या (Suicide) केली. सुशांतच्या मृत्यूनंतर अंमली पदार्थांशी संबंधित बाजू समोर आली आणि एनसीबीने चित्रपट, टिव्ही वाहिन्यांशी संबंधित लोकांशी चौकशी सुरू केली. सुशांतची मैत्रीण रिया आणि तिचा भाऊ शौविकला अन्य ड्रग्स पेडलर्ससोबत अटक करण्यात आली. त्यापैकी अनेकजण सध्या जामीनावर आहेत. एनसीबीने मागील महिन्यात या प्रकरणाशी संबंधित ३५ आरोपींविरोधात विशेष एनडीपीएस न्यायालयात आरोपांचा मसुदा दाखल केला होता. तो मंगळवारी उपलब्ध करण्यात आला.
मसुद्यातील आरोपांनुसार, सर्व आरोपींनी मार्च ते डिसेंबर २०२० या कालावधीदरम्यान उच्चभ्रू समाज आणि बॉलीवूडमध्ये ड्रग्स खरेदी, विक्री आणि वितरण करण्याचा कट रचला. आरोपींनी अमली पदार्थांच्या तस्करीला वित्तपुरवठाही करून गांजा, चरस, कोकेन आणि अन्य अंमली पदार्थांचे अवैधपणे विक्री केली. म्हणूनच सर्व आरोपींवर कलम २७ आणि २७ अ(बेकायदेशीररित्या वित्तपुरवठा करणे आणि गुन्हेगारांना आश्रय देणे) २८ (गुन्हा करण्याच्या प्रयत्नांसाठी शिक्षा), २९ (गुन्हेगारी, षड्यंत्राला प्रोत्साहन देणे) यांसारख्या एनडीपीएस कायद्याच्या तरतुदींनुसार आरोप ठेवण्यात आले आहेत. तसेच रिया चक्रवर्तीने या प्रकरणातील आरोपी आणि ड्रग्स पेडलर्स सॅम्युअल मिरांडा, शौविक, दीपेश सावंतसह अन्य पडलर्सकडून अनेकदा गांजा सुशांतला दिला आहे. शौविक आणि सुशांतच्या सांगण्यावरून तिने मार्च आणि सप्टेंबर २०२० पर्यंतचे अमली पदार्थांचे पैसेही दिले असल्याचे एनसीबीने नमूद केले आहे. रियाचा भाऊ शौविक अमली पदार्थ तस्करांच्या नियमित संपर्कात होता तो त्यांच्याकडून गांजा आणि चरसची ऑर्डर घेत असे आणि सुशांतकडे सुपूर्द करत असल्याचेही एनसीबीने आरोपींच्या मसुद्यात म्हटले आहे.
निर्माता क्षितिज प्रसादकडून दोषमुक्ततेसाठी अर्ज
सुशांतच्या आत्महत्येप्रकरणी आरोपी निर्माता क्षितिज प्रसादने विशेष न्यायालयात दोषमुक्ततेसाठी अर्ज केला आहे. प्रसादला पोलिसांनी दोन वर्षांपूर्वी अटक केली होती. सध्या तो जामिनावर आहे. मात्र, या प्रकरणात मला नाहक ओढले असून मी अमलीपदार्थ घेत नाही. केवळ अन्य एका आरोपीच्या व्हॉट्सअँप चॅटमध्ये उल्लेख झाला म्हणून आपल्यावर कारवाई केल्याचा बचाव प्रसादने केला आहे. पोलिसांनी अटक केल्यानंतर आपल्यावर करण जोहर, अर्जुन रामपाल आणि रणबीर कपूरचा उल्लेख करण्यात दबाव टाकण्यात आल्याचा आरोपही त्याने केला होता. मात्र, प्रसादच्या आरोपांचे एनसीबीने खंडन केले होते. या प्रकरणी विशेष न्यायाधीश व्ही. जी रघुवंशी यांच्यासमोर २७ जुलै रोजी सुनावणी पार पडणार आहे.
.png "Videos"){kind=small}
