शनिवार, 17 ऑक्टोबर 2026
फोटो सौजन्य- gemini
गायमुख कॅडबरी जंक्शन असा प्रवास मेट्रोने करण्याची ठाणेकरांची प्रतीक्षा आता लवकरच संपण्याची शक्यता आहे. वडाळा- ठाणे – कासारवडवली गायमुख मेट्रो ४, मेट्रो ४अ मार्गिकवरील गायमुख – कॅडबरी जंक्शन पहिल्या टप्प्यातील गाड्यांना मेट्रो आयुक्त, मेट्रो रेल्वे सुरक्षा आयुक्त (सीएमआरएस), दिल्ली यांच्याकडून सुरक्षा प्रमाणपत्र प्राप्त झाले आहे. आता केवळ संपूर्ण मार्गिकेसाठी सुरक्षा प्रमाणपत्र मिळाल्यास या टप्प्याच्च्या संचालनाचा मार्ग मोकळा होणार आहे. त्यामुळे वर्षाअखेरीस हा टप्पा वाहतूक सेवेत दाखल होऊन ठाणेकरांचे मेट्रो प्रवासाचे स्वप्न पूर्ण होण्याची शक्यता आहे. मुंबई महानगर प्रदेश विकास प्राधिकरणाच्या (एमएमआरडीए) १४ मेट्रो प्रकल्पातील मेट्रो ४ (३२.३२ किमी), मेट्रो ४ अ (२.७ किमी) मार्गिकेचे काम सध्या सुरू आहे. या मार्गिकेतील गायमुख-कॅडबरी जंक्शन असा १०.५ किमीचा टप्पा २०२५ मध्ये पूर्ण करून वाहतूक सेवेत दाखल करण्याचे एमएमआरडीएचे नियोजन होते.
कामाची संथगती आणि इतर कारणांमुळे हा टप्पा वाहतूक सेवेत दाखल होण्यास विलंब होत आहे. त्यामुळे ठाणेकरांची मेट्रो प्रवासाची प्रतीक्षा वाढली असून याबद्दल ठाणेकरांमध्ये नाराजी आहे. पण आता मात्र हा टप्पा दृष्टिक्षेपात आला आहे. काही दिवसांपूर्वीच या संपूर्ण मार्गिकेच्या सीएमआरएस चाचण्यांना सुरुवात करण्यात आली आहे. आता गायमुख कॅडबरी मार्गिकेवरील गाड्यांची सीएमआरएस चाचणी पूर्ण झाली असून ही चाचणी यशस्वी झाली आहे.
या सहा गाड्यांनाच सुरक्षा प्रमाणपत्र प्राप्त झाले असून याच गाड्या आता गायमुख -कॅडबरी जंक्शनपर्यंत वर्षअखेरपासून धावणार आहेत. तर या मार्गिकेसाठी खरेदी करण्यात आलेल्या ३९ मेट्रो गाड्या ताफ्यात दाखल होताच त्यांची सुरक्षा चाचणी करण्यात येणार आहे. या गाड्यांना सुरक्षा प्रमाणपत्र प्राप्त झाल्यानंतर त्या टप्प्याटप्प्याने सेवेत दाखल करण्यात येणार आहेत.
गायमुख- कॅडबरी जंक्शनवर सहा मेट्रो गाड्या धावणार आहेत. त्यानुसार सहा गाड्यांची चाचणी यशस्वी झाल्याने गाड्यांसाठी सीएमआरएसकडून सुरक्षा प्रमाणपत्र प्राप्त झाल्याची माहिती एमएमआरडीएतील अधिकाऱ्यांनी दिली. दरम्यान, मेट्रो ४ आणि मेट्रो ४ अ मार्गिकेसाठी एमएमआरडीएकडून गाड्या खरेदी करण्यात आल्या आहेत. मात्र, या गाड्या अद्याप ताफ्यात दाखल झालेल्या नाहीत. त्यामुळे या गाड्यांची वाट न पाहता मेट्रो २ अ (दहिसर अंधेरी पश्चिम), मेट्रो ७(दहिसर गुंदवली) आणि मेट्रो ९ (दहिसर मीरा-भाईंदर) मार्गिकेतील सहा नव्या गाड्यांचा वापर गायमुख कॅडबरी जंक्शन टप्प्यासाठी केला जाणार आहे.
(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)
