बुधवार, 21 ऑक्टोबर 2026
सौजन्य - नवराष्ट्र टीम
सातारा : धर्मवीर छत्रपती संभाजी महाराज यांच्या चरित्रावर आधारित ऐतिहासिक छावा चित्रपट प्रदर्शनाला तयार आहे मात्र त्या चित्रपटात छत्रपती संभाजीराजे हे एका दृश्यामध्ये नृत्य करताना दिसले आहेत. या संदर्भात येसूबाई फाउंडेशनचे संस्थापक अध्यक्ष सुहास राजेशिर्के यांनी चित्रपट प्रदर्शित होऊ देणार नाही असा इशारा दिला होता. आता खासदार उदयनराजे भोसले यांनी लक्ष्मण उतेकर यांना फोन करुन सदर दृश्याविषयी इतिहास तज्ञांची आपण चर्चा करावी अशी सूचना केली, या सूचनेला उतेकर यांनी सकारात्मक प्रतिसाद दिल्याची माहिती आहे
मराठीतील ख्यातनाम सिनेमाटोग्राफर आणि दिग्दर्शक लक्ष्मण उतेकर यांचा हिंदी चित्रपट “छावा” येत्या १४ फेब्रुवारीला रिलीज होत आहे.या चित्रपटात छत्रपती संभाजी महाराजांची भूमिका करणारा अभिनेता विकी कौशल याला नृत्य करताना दाखविले आहे. या चित्रपटातील दृश्यांवर इतिहास प्रेमींनी काही आक्षेप घेतले आहेत. या चित्रपटातील दिग्दर्शक लक्ष्मण उतेकर यांनी इतिहास संशोधक आणि आमच्याशी चर्चा करायला हवी होती. तसेच चित्रपटातील काही दृश्यांना हटविण्याची मागणी त्यांनी केली होती.
खासदार छत्रपती उदयनराजे भोसले यांनी ‘छावा ‘ चित्रपटाचे दिग्दर्शक लक्ष्मण उतेकर यांना फोन केला. आणि चित्रपटातील छत्रपती संभाजी राजांचे लेझीम गाण्यावर असणारे आक्षेपार्ह सीन हटवण्याच्या सूचना केल्या आहेत. यानंतर दिग्दर्शक लक्ष्मण उत्तेकर यांनी संबंधित सिन हटवण्याची ग्वाही दिली आहे. खासदार उदयनराजे भोसले यांनी लक्ष्मण उतेकर यांना फोन करून या चित्रपटात काही आक्षेपार्ह घटना जर दाखवल्या गेल्या असतील तर त्या हटविण्यात याव्यात असे म्हटले आहे. लोकांपर्यंत चांगला चित्रपट घेऊन जावा आणि आजच्या पिढीसमोर आपल्या छत्रपती शिवाजी महाराज आणि छत्रपती संभाजी महाराज यांनी देशासाठी आणि धर्मासाठी केलेले योगदान चांगल्या पद्धतीने जगाच्या समोर यावे अशी सूचना देखील केली आहे.
हे सुद्धा वाचा : गुन्हेगारांना खुली सूट! पिंपरी-चिंचवड शहरात अनेक CCTV कॅमेरे फक्त टांगलेलेच
या चित्रपटांमध्ये दाखवण्यात आलेल्या काही घटना इतिहास तज्ज्ञ आणि अभ्यासक यांना हा चित्रपट दाखवावा. चित्रपटाची व्यवस्थित मांडणी करूनच हा चित्रपट रिलीज करावा जेणेकरून समाजामध्ये यावरुन वाद निर्माण होणार नाहीत असे यावेळी त्यांनी सांगितले.यावेळी छावा चित्रपटाचे दिग्दर्शक लक्ष्मण उतेकर यांनी सकारात्मक प्रतिसाद देत लवकरच दुरुस्तीसह हा चित्रपट प्रदर्शित करू असा विश्वास व्यक्त केला आहे.
