सलील कुलकर्णींनी लेकीसाठी वाढदिवसानिमित्त शेअर केली सुंदर पोस्ट, म्हणाले, “माझ्या जीवाची सावली…”
राष्ट्रीय पुरस्कार विजेते, संगीतकार, गीतकार आणि गायक सलील कुलकर्णी सोशल मीडियावर कायमच सक्रिय असतात. कायमच गाण्यांमुळे चर्चेत राहणारे गायक सलील कुलकर्णी सध्या त्यांच्या खासगी आयुसष्यामुळे चर्चेत आले आहेत. ते कायमच इन्स्टाग्रामवर कामासोबतच वैयक्तिक आयुष्याबाबतीतही पोस्टच्या माध्यमातून चर्चेत असतात. नुकतीच त्यांची मुलगी अनन्या हिचा वाढदिवस होता. तिच्या वाढदिवसानिमित्त सलील कुलकर्णी यांनी इन्स्टाग्रामवर सुंदर पोस्ट शेअर केली आहे. त्यांनी शेअर केलेल्या पोस्टने सगळ्यांचंच लक्ष वेधलं आहे.
सलील कुलकर्णी यांनी मुलगी अनन्याच्या बालपणींपासूनचे फोटो शेअर करत कॅप्शन दिले की, “आमची अनन्या… आज अठरा वर्षांची झाली… आता मला पुन्हा हळूहळू लहान व्हायला हरकत नाही… आता दोन दोन आई आहेत मला… पण… इतक्या लवकर झालीस मोठी… अगदी अगदी आत्ता आत्तापर्यंत तर शाळेत जातांना, एकदा मोज्याच्या आतला दोरा टोचतोय… एकदा ड्रेसचं लेबल टोचतंय… हे नीट करून दे… तरच मी शाळेत जाईन म्हणणारी… आणि मी सगळं आवरून खाली जात नाही… तोपर्यंत दादाने पण जायचं नाही… असे रोज नवे नवे हट्ट करणारी माझ्या जीवाची सावली.”
पुढे सलील कुलकर्णींनी लिहिलं, “आता एकदम समजूतदार, शहाणी आणि जिथे फोकस करेल ते उत्तम करणारी अनन्या कधी झाली… कळलं सुद्धा नाही… कोणत्याही सहलीला अगदी आमच्या अमेरिकेच्या दौऱ्यात सुद्धा एकदाही माझ्या कडेवरून न उतरलेली… कमीत कमी बोलून अख्ख्या कुटुंबाच्या हास्याचा रिमोट जिच्या हातात आहे… ती अनन्या… क्रिकेट मॅचेसला एकटी जाऊन राहते, खेळते… कधी सिलेक्ट नाही झाली तर तिची तिची समजून घेते… एवढी मोठी झाली?”
“गाणं, वादन, उत्तम येत असूनही फक्त मोजक्या २-३ लोकांसमोर सादर करणारी… आणि माझं क्रीडापटू होण्याचं स्वप्न क्रिकेटर होऊन पूर्ण करणारी अनन्या… शुभंकरने त्याच्या कॉन्सर्टला काय कपडे घालावेत इथंपासून… सगळे निर्णय जिला विचारूनच घ्यावेसे वाटतात अशी आजीची सर्वात लाडकी नात… आपण सगळे एका दिवसात बोलतो तेवढं पंधरा दिवसांत बोलणारी मितभाषी कन्या हृदयनाथजींपासून सगळ्यांची लाडकी आहे… बस एक स्माईल ही काफी है…” असं सलील यांनी लिहिलं.
“अनन्या, प्रत्येक जन्मी मला तुझा बाबा होऊ दे… किंवा मग तुझा मुलगा तरी… पण तू आणि शुभू माझ्याबरोबरच होतात अनेक जन्म आणि असणारच… खूप खूप मोठी हो… तुझ्या प्रत्येक मॅचमध्ये तू बॉल टाकायला धावत येशील तेव्हा तुझा बाबा पण मनातून तुझ्यासाठी धावेल… कायम हसत राहा… खूप खूप आशीर्वाद… तुझा बाबा,” सलील कुलकर्णींच्या ही सुंदर पोस्ट चांगलीच चर्चेत आली आहे. दरम्यान, सलील कुलकर्णी यांच्या या पोस्टवर अनेक सेलिब्रिटींसह चाहत्यांनीही प्रतिक्रिया देत अनन्याला वाढदिवसाच्या शुभेच्छा दिल्या आहेत.
‘पुष्पा २’ची वेळ आणखीन २० मिनिटांनी वाढणार; नव्या फुटेजसोबत चित्रपट थिएटरमध्ये कधी रिलीज होणार?
.png "Videos"){kind=small}
