शनिवार, 29 ऑगस्ट 2026
Sangli Politics: सांगली राजकीय वर्तुळात खळबळ! जतमध्ये दोन माजी आमदारांसह ४० जणांवर पोलिसांत गुन्हा दाखल
Sangli Jat Protest FIR Against Ex MLAs: सांगलीच्या राजकीय वर्तुळातून एक महत्त्वाची घडामोड समोर आली आहे. सांगलीच्या जत शहरातील महाराणा प्रताप चौकात सर्व पक्षीयांकडून आंदोलन करण्यात आले होते. जत तालुक्याचे नामांतर आणि नियमित पाणीपुरवठ्यासाठी रास्ता रोको आंदोलनही करण्यात आले होते. पण या आंदोलनावेळी सरकारच्या विरोधात भाषणे केल्याप्रकरणी दोन माजी आमदार, दोन जिल्हा बँक संचालकांसह ४० जणांविरोधात जत पोलिसांनी गुन्हा दाखल केला आहे.
माजी आमदार विलासराव जगताप, माजी आमदार विक्रमसिंह सावंत, जिल्हा बँकेचे संचालक प्रकाश जमदाडे आणि मन्सूर खतीब यांच्यासह सर्वपक्षीय नेते आणि आंदोलकांचा गुन्हा दाखल झालेल्यांमध्ये समावेश आहे. जिल्हाधिकाऱ्यांच्या बंदी आदेशाचा भंग करून राष्ट्रीय महामार्गावरील वाहतूक रोखल्याचा आरोप संबंधित आंदोलकांवर करण्यात आला आहे.
FDAचा राज्यभर दणका! ११.८२ लाखांचं संशयास्पद खाद्यतेल जप्त; मुंबईतील ४ हॉटेल्सचे परवाने निलंबित
या प्रकरणी जत पोलिस ठाण्यात गुन्हा क्रमांक ४८८/२०२६ दाखल करण्यात आला आहे. पोलिस हवालदार श्रीशैल बिसलाप्पा वळसंग यांनी याबाबत फिर्याद दिली आहे.पोलिसांच्या फिर्यादीनुसार, जिल्हाधिकाऱ्यांनी लागू केलेल्या बंदी आदेशाचे उल्लंघन करत आंदोलकांनी राष्ट्रीय महामार्गावरील वाहतूक अडवली. याप्रकरणी भारतीय न्याय संहितेतील कलम २२१, १८९(२), महाराष्ट्र पोलिस अधिनियमातील कलम १३५(३) तसेच राष्ट्रीय महामार्ग कायद्यातील संबंधित तरतुदींनुसार कारवाई करण्यात आली आहे.
या कारवाईत माजी आमदार विलासराव जगताप, माजी आमदार विक्रमसिंह सावंत, जिल्हा बँकेचे संचालक प्रकाश जमदाडे, मन्सूर खतीब आणि माजी सभापती तम्मणगौडा रवीपाटील यांच्यासह इतर पक्षांतील नेत्यांवर गुन्हे दाखल करण्यात आले आहेत.
काँग्रेसचे ज्येष्ठ नेते आप्पाराया बिरदार, माजी सभापती सुजय ऊर्फ नाना शिंदे, पंचायत समिती सदस्य प्रमोद सावंत, शिवसेनेचे अमित ऊर्फ बंटी दुधाळ, नगरसेवक संतोष कोळी, माजी नगरसेवक नीलेश बामणे, युवराज निकम, रवींद्र सावंत, अजिंक्य सावंत, राहुल बाबर, महादेव पाटील, ईरण्णा निडोणी, परशुराम सांगोलकर, प्रकाश माने, बाबासाहेब कोडग, विवेक कोकरे, महांतेश पाटील आणि रासप नेते अजित पाटील यांच्यासह अन्य आंदोलकांविरोधातही गुन्हा दाखल करण्यात आला आहे.
रास्ता रोको आंदोलनादरम्यान वाहतूक रोखणे आणि सरकारविरोधात भाषणे केल्याच्या पार्श्वभूमीवर ही कारवाई करण्यात आल्याचे पोलिसांनी नमूद केले आहे. या प्रकरणाचा पुढील तपास जत पोलिसांकडून सुरू आहे.
