बुधवार, 21 ऑक्टोबर 2026
बारामती नगरपालिका निवडणुकीत येणार रंगत; माजी नगराध्यक्ष सुनिल पोटेंनी मुलाला सोडून जितेंद्र गुजर यांना दिले समर्थन
बारामती : बारामती नगरपालिका निवडणुकीत आता रंगत येणार आहे. बारामती नगरपालिकेच्या निवडणुकीसाठी प्रभाग क्रमांक १५ मधील राष्ट्रवादी काँग्रेसचे उमेदवार जितेंद्र गुजर यांना माजी नगराध्यक्ष सुनील पोटे यांनी थेट समर्थन देत आपला मुलगा यशपालच्या पाठीशी नाही तर जितेंद्र गुजर यांच्या पाठीशी आहोत, अशी स्पष्ट भूमिका त्यांनी जाहीर केली.
माजी नगराध्यक्ष सुनील पोटे यांचे चिरंजीव यशपाल पोटे हे प्रभाग क्रमांक १५ मधून अपक्ष उमेदवार म्हणून लढत आहेत. प्रभाग क्रमांक १५ मधील राष्ट्रवादी काँग्रेस पक्षाच्या राष्ट्रवादी पॅनलचे उमेदवार मंगल किर्वे व जितेंद्र गुजर यांच्या प्रचाराचा शुभारंभ शुक्रवारी भिगवन चौक येथे करण्यात आला. तेली पंच मारुती मंदिर व सिद्धी गणेश मंदिर येथे नारळ फोडून प्रचाराची सुरुवात झाली.
या कार्यक्रमाला नगराध्यक्ष पदाचे उमेदवार सचिन सातव, माजी नगराध्यक्ष सुनील पोटे, सुभाष सोमानी, जय पाटील, अभिजीत काळे, ऋतुराज काळे, बिरजू मांढरे, अभिजीत चव्हाण, नितीन बागल, जितेंद्र गुजर यांच्यासह विविध क्षेत्रातील मान्यवर व मोठ्या जितेंद्र गुजर संख्येने कार्यकर्त्यांची उपस्थिती होती.
हेदेखील वाचा : Baramati Politics: पुणे जिल्ह्यातील नगरपरिषद निवडणुका चुरशीच्या; बारामतीत महायुती-आघाडी आमने-सामने
दरम्यान, प्रभाग क्रमांक 15 कडे बारामतीकरांचे विशेष लक्ष लागले आहे. कारण या प्रभागात माजी नगराध्यक्ष सुनील पोटे यांचे चिरंजीव यशपाल पोटे यांनीही उमेदवारी अर्ज दाखल केला आहे. मात्र, उमेदवारी अर्ज मागे घेण्याच्या अंतिम तारखेपूर्वीच सुनील पोटे यांनी तेली पंच मारुती मंदिर येथे तेली समाजातील बांधवांची विशेष बैठक आयोजित केली.
जितेंद्र गुजर यांच्या बाजूने, प्रचारासाठी कार्यरत राहणार
या बैठकीत बोलताना सुनील पोटे म्हणाले, ‘अजितदादांनी माझ्या शब्दाखातर माझी बहीण मंगल किर्वे यांना उमेदवारी दिली आहे. मी त्यांच्या पाठीशी ठाम उभा आहे. यशपालला समजवण्याचा प्रयत्न केला. परंतु, तो ऐकत नाही. त्यामुळे मी या निवडणुकीत जितेंद्र गुजर यांच्या बाजूने असून, त्यांच्या प्रचारासाठी कार्यरत राहणार आहे. तुम्हीही यशपालच्या पाठिशी उभे राहू नका’, असे आवाहन उपस्थितांना केले.
अजितदादांनी माझा शब्द पाळला
‘अजितदादांनी माझा शब्द पाळला आहे. आपण त्यांचा शब्द डावलू नये. सर्वांनी एकजुटीने उभे राहून जितेंद्र गुजर यांना प्रचंड बहुमताने विजयी करूया’.
– सुनिल पोटे, माजी नगराध्यक्ष.
