शनिवार, 17 ऑक्टोबर 2026
Maratha Reservation: सोलापुरात जयकुमार गोरे यांचा ताफा अडवण्याचा प्रयत्न; जरांगेंच्या उपोषणाच्या चौथ्या दिवशी आंदोलन तीव्र
Maratha Reservation : अंतरवाली सराटी येथे मनोज जरांगे पाटील यांचे मराठा आरक्षणासाठी सुरू असलेले उपोषण चौथ्या दिवशीही कायम आहे. जरांगे पाटील यांची प्रकृती खालावत असल्याच्या पार्श्वभूमीवर राज्यातील विविध भागांत मराठा बांधव आक्रमक होताना दिसत आहेत. धाराशिव आणि सोलापूर जिल्ह्यातही आंदोलकांनी वेगवेगळ्या पद्धतीने शासनाचे लक्ष वेधण्याचा प्रयत्न केला.
सोलापूर जिल्ह्यातील माढा तालुक्यातील टेभुर्णी येथे ग्रामविकासमंत्री तथा जिल्ह्याचे पालकमंत्री जयकुमार गोरे यांच्या ताफ्यासमोर काही मराठा आंदोलकांनी आंदोलन केले. चार ते पाच आंदोलकांनी गाडीसमोर येत ‘एक मराठा, लाख मराठा’ तसेच मनोज जरांगे पाटील यांच्या समर्थनार्थ घोषणाबाजी केली. काही आंदोलकांनी वाहनासमोर आडवे होऊन ताफा रोखण्याचाही प्रयत्न केल्याची माहिती समोर आली.
जयकुमार गोरे हे माढ्याचे माजी आमदार बबनराव शिंदे यांच्या सत्कार सोहळ्यासाठी जात असताना हा प्रकार घडला. ताफ्यात माढ्याचे माजी खासदार रणजितसिंह नाईक निंबाळकर हेही उपस्थित होते. पोलिसांनी तत्काळ हस्तक्षेप करत आंदोलकांना बाजूला केले. त्यानंतर पालकमंत्र्यांचा ताफा पुढे रवाना झाला.
ताफा अडवण्याचा प्रयत्न झाल्यानंतर जयकुमार गोरे कार्यक्रमस्थळी पोहोचले. तेथे त्यांनी सहाय्यक पोलिस अधीक्षक अंजना कृष्णा यांच्याशी चर्चा केल्याची माहिती आहे. या घटनेनंतर परिसरातील सुरक्षा व्यवस्थेबाबत पोलीस यंत्रणा अधिक सतर्क झाल्याचे दिसून आले.
दरम्यान, धाराशिवमध्येही मराठा आंदोलकांनी वेगळ्या पद्धतीने आंदोलन करत शासनाचे लक्ष वेधले. सामाजिक न्याय विभागाच्या उंच इमारतीवर चढून काही आंदोलकांनी आपली भूमिका मांडल्याने तेथील परिस्थितीही चर्चेचा विषय ठरली.
सांगोला विधानसभा मतदारसंघाचे माजी आमदार शहाजी बापू पाटील यांनी अंतरवाली सराटी येथे जाऊन मनोज जरांगे पाटील यांची भेट घेतली. जरांगे पाटील यांची खालावलेली प्रकृती पाहून ते भावूक झाल्याचे सांगण्यात आले. त्यांनी मंत्री शंभुराज देसाई यांच्याशीही दूरध्वनीवरून चर्चा केली.
मनोज जरांगे पाटील यांच्या उपोषणाची परिस्थिती आणि राज्यभरातून वाढत असलेला मराठा समाजाचा पाठिंबा पाहता, मराठा आरक्षणाचा मुद्दा पुन्हा एकदा राज्याच्या राजकारणाच्या केंद्रस्थानी आला आहे.
