शुक्रवार, 23 ऑक्टोबर 2026
India W Beat Zimbabwe W
भारताविरुद्धच्या पहिल्या एकदिवसीय सामन्यात झिम्बाब्वेचा संघ मोठी धावसंख्या उभारण्यात अपयशी ठरला. नाणेफेक जिंकून प्रथम फलंदाजी करण्याचा निर्णय घेतलेल्या झिम्बाब्वेचा संघ ४९.५ षटकांत १९७ धावांवर सर्वबाद झाला. भारतीय गोलंदाजांनी सुरुवातीपासूनच झिम्बाब्वेच्या फलंदाजांवर दबाव कायम ठेवला. बिलव्हेड बिझाने शानदार फलंदाजी करत ९२ चेंडूंमध्ये ६२ धावा करून सर्वाधिक धावा केल्या. मॉडेस्टर मुपाचिकवाने २५, तर मिचेल मावुंगाने २९ धावा केल्या.
श्री चरणीने दोघांनाही पव्हेलियनचा रस्ता दाखवला. भारताकडून डावखुरी फिरकी गोलंदाज श्री चरणीने २३ धावा देऊन ४ विकेट घेत शानदार गोलंदाजी केली. ही तिच्या कारकिर्दीतील सर्वोत्तम गोलंदाजी होती. वेगवान गोलंदाज क्रांती गौडने ३ विकेट् घेतले, तर दीप्ती शर्माने फिरकीच्या जाळ्यात दोन खेळाडूंना अडकवले. याशिवा, शफाली वर्मानेही एक विकेट घेतला. भारताने झिम्बाब्वेला १९७ धावांवर गुंडाळले.
१९८ धावांचे लक्ष्य गाठताना, भारतीय महिला संघाने दमदार फलंदाजीचे प्रदर्शन केले. सलामीवीर प्रतीका रावलने शानदार शतक झळकावून संघाची सूत्रे हाती घेतली आणि शेवटपर्यंत खेळपट्टीवर टिकून राहिली. तिच्या खेळीमुळे संघाचा विजय निश्चित झाला. प्रतीकाने कर्णधार स्मृती मंधानासोबत पहिल्या विकेटसाठी ९४ धावांची भागीदारी केली. मंधाना बाद होण्यापूर्वी ३२ धावा करून संघाला एक भक्कम सुरुवात करून दिली.
मंधाना बाद झाल्यानंतर शफाली वर्मा प्रतीकासोबत फलंदाजीला आली. दोन्ही फलंदाजांनी झटपट धावा केल्या. आक्रमक फलंदाजी करत झिम्बाब्वेच्या गोलंदाजीवर दबाव कायम ठेवला. शफाली ६४ धावांवर नाबाद राहिली, तर प्रतीकाने आपले शतक पूर्ण करून संघाला विजय मिळवून दिला. भारतीय महिला संघाने २७.१ षटकांत एक विकेट गमावून २०० धावा पूर्ण केल्या आणि हा सामना ९ विकेट्सने जिंकला.
