मंगळवार, 20 ऑक्टोबर 2026
National Sports Day Khelo India Samvad
Table Tennis: दोन गेममध्ये पराभव मात्र शानदार पुनरागमन; अनन्या पाटीलने मिळवले अजिंक्यपद
पंतप्रधान नरेंद्र मोदी यांनी देशभरातील तरुण आणि खेळाडूंशी संवाद साधताना क्रीडा क्षेत्राच्या विकासात युवकांची भूमिका महत्त्वाची असल्याचे सांगितले. क्रीडा हे केवळ पदक मिळविण्याचे माध्यम नसून शिस्त, आत्मविश्वास, नेतृत्वगुण, संघभावना आणि निरोगी जीवनशैली घडविणारे प्रभावी साधन असल्याचा संदेश त्यांनी दिला. तळागाळातील क्रीडा सुविधा सक्षम करणे, गुणवत्तापूर्ण प्रशिक्षण आणि प्रशिक्षक उपलब्ध करून देणे, तसेच ग्रामीण व दुर्गम भागातील प्रतिभावान खेळाडूंना संधी उपलब्ध करून देण्यावर त्यांनी भर दिला. भारताच्या २०३६ ऑलिम्पिकच्या आकांक्षांच्या पार्श्वभूमीवर युवा खेळाडूंची शास्त्रीय पद्धतीने निवड, दीर्घकालीन प्रशिक्षण आणि सर्वांगीण विकासाची आवश्यकता असल्याचेही त्यांनी स्पष्ट केले. तरुणांनी नियमित व्यायाम आणि खेळाला जीवनशैलीचा भाग बनवावा, व्यसनांपासून दूर राहावे तसेच समाज आणि राष्ट्राच्या विकासात सक्रिय योगदान द्यावे, असे आवाहन त्यांनी केले. मातोश्री शांताबाई गोटे महाविद्यालयातील कार्यक्रमाच्या अध्यक्षस्थानी संजय गोटे होते. माध्यमिक शिक्षणाधिकारी मंगल धुपे, प्रा. डॉ. जी. एस. कुबडे आणि डॉ. सुमित गोटे प्रमुख अतिथी म्हणून उपस्थित होते.
राष्ट्रीय स्तरावर प्रतिनिधित्व केलेले खेळाडू संघर्ष खिल्लारे आणि अंकिता सावळे तसेच राष्ट्रीय खो-खो स्पर्धेत कलर कोड प्राप्त खेळाडू साहिल राऊत यांनीही कार्यक्रमात सहभाग घेतला. तरुणांनी क्रीडा क्षेत्रातील उपलब्ध संधी, प्रशिक्षण आणि सुविधांबाबत संवाद साधला. प्रास्ताविक डॉ. डी. एन. लांजेवार यांनी केले. ‘मेरा युवा भारत’ केंद्राचे कार्यक्रम अधिकारी अनिल देंगे यांच्या मार्गदर्शनाखाली कार्यक्रम पार पडला. कार्यक्रमाच्या यशस्वीतेसाठी डॉ. एस. पी. कुमरे, प्रा. एस. एस. काळपांडे आणि डॉ. जी. ए. बळी यांनी सहकार्य केले.
