शनिवार, 17 ऑक्टोबर 2026
Israel-US War : अमेरिकेची 'संरक्षण ढाल' बनली इस्रायलसाठी ढाल; इराणचे धोकादायक बॅलिस्टिक क्षेपणास्त्र हवेतच पाडले हाणून ( फोटो सौजन्य : सोशल मीडिया)
Israel US missile shield : मध्यपूर्वेतील तणाव आज अधिकच वाढला आहे. इराणने पुन्हा एकदा इस्रायलवर बॅलिस्टिक क्षेपणास्त्राने हल्ला करण्याचा प्रयत्न केला, परंतु अमेरिकेच्या अत्याधुनिक हवाई संरक्षण यंत्रणेमुळे तो हल्ला अयशस्वी ठरला. अमेरिकेच्या संरक्षण ढालीने हे क्षेपणास्त्र हवेतच नष्ट करत इस्रायलला मोठ्या संकटापासून वाचवले आहे. ही घटना इराण आणि इस्रायलमधील दीर्घकालीन संघर्षाचा आणखी एक टप्पा ठरली आहे. विशेष म्हणजे, काही दिवसांपूर्वीच अमेरिकेने इराणमधील तीन अणु केंद्रांवर हवाई हल्ला केला होता, ज्यामुळे प्रादेशिक तणाव अधिकच तीव्र झाला आहे.
इस्रायली आर्मी रेडिओच्या वृत्तानुसार, अमेरिकेच्या हल्ल्यानंतर चिडलेल्या इराणने इस्रायलच्या दिशेने एक अत्यंत घातक बॅलिस्टिक क्षेपणास्त्र डागले. हे क्षेपणास्त्र इस्रायलच्या नागरी भागात गंभीर हानी पोहोचवू शकले असते. मात्र, अमेरिकेच्या संरक्षण यंत्रणेने त्वरित कारवाई करत ते हवेतच नष्ट केले. यामुळे इस्रायल मोठ्या संकटातून वाचला असला, तरी या घटनेनंतर इस्रायली नागरिकांमध्ये भीतीचे वातावरण निर्माण झाले आहे. या हल्ल्यात इस्रायलच्या एका मोठ्या रुग्णालयावर देखील आघात झाला असल्याचे वृत्त आहे. त्या घटनेत अनेक नागरिक जखमी झाल्याचे सांगण्यात येत आहे.
अमेरिकेचे माजी राष्ट्राध्यक्ष डोनाल्ड ट्रम्प यांनी पूर्वीच इराणला अणु कार्यक्रम थांबवण्यासाठी इशारा दिला होता. परंतु, इराणने आपल्या धोरणात बदल केला नाही. त्यामुळे अखेर अमेरिका युद्धात उडी घेत इराणच्या अणु तळांवर हवाई हल्ले केले. या कारवाईत इराणचे तीन अणु संशोधन केंद्रे निशाणा बनली. यामुळे इराणचा प्रतिउत्तरात्मक बॅलिस्टिक क्षेपणास्त्र हल्ला अपेक्षित होता. मात्र, अमेरिकेच्या तंत्रज्ञानाने तो हल्ला निष्फळ ठरवला.
जागतिक घडामोडी संबंधित बातम्या वाचण्यासाठी येथे क्लिक करा : Iran nuclear sites strike : ‘इराण एक मोठी अणुशक्ती अन् खामेनींची राजवट…’ इस्रायलने स्पष्टच सांगितला युद्धाचा उद्देश
या सर्व घडामोडींमुळे केवळ मध्यपूर्वच नव्हे, तर दक्षिण आशियातही चिंता वाढली आहे. इराणवर झालेल्या हल्ल्यांनंतर आणि संभाव्य विस्ताराला रोखण्यासाठी पाकिस्तानने राष्ट्रीय सुरक्षा समितीची (NSC) तातडीची बैठक बोलावली आहे. या बैठकीच्या अध्यक्षस्थानी पंतप्रधान शाहबाज शरीफ असणार आहेत. त्यांच्यासोबत लष्करप्रमुख फील्ड मार्शल असीम मुनीर, गुप्तचर विभाग प्रमुख आणि विविध संरक्षण दलांचे वरिष्ठ अधिकारी उपस्थित राहणार आहेत. या बैठकीत प्रादेशिक सुरक्षेच्या धोक्यांवर चर्चा केली जाणार असून, अमेरिका-इराण संघर्षाचे पाकिस्तानवर होणारे संभाव्य परिणाम यावरही चर्चा अपेक्षित आहे.
इराण आणि इस्रायलमधील संघर्ष आता गंभीर वळणावर आला आहे. अमेरिका थेट युद्धात उतरल्यामुळे आंतरराष्ट्रीय राजकारणात हालचाली वाढल्या आहेत. अमेरिका आणि इस्रायलच्या संयुक्त यंत्रणांमुळे इराणला अडथळे येत असले, तरी परिस्थिती काहीशी अनिश्चित आहे. तज्ज्ञांच्या मते, हा संघर्ष थांबवण्यासाठी आंतरराष्ट्रीय समुदायाला पुढाकार घ्यावा लागेल, अन्यथा याचे पडसाद संपूर्ण जगभर उमटू शकतात.
जागतिक घडामोडी संबंधित बातम्या वाचण्यासाठी येथे क्लिक करा : US Iran Airstrike: ‘वेळ, पद्धत आणि ॲक्शन, सर्वकाही सैन्य ठरवेल’, इराणला राग अनावर, UNSC मध्ये दिली धमकी
अमेरिकेने इस्रायलसाठी ‘संरक्षण ढाल’ बनत इराणचा हल्ला हाणून पाडला असला, तरी या घटनेमुळे संपूर्ण मध्यपूर्वात अस्थिरता वाढली आहे. पाकिस्तानसारखे शेजारी देशही सतर्क झाले असून, आगामी काळात आणखी गंभीर परिणाम दिसून येण्याची शक्यता आहे. या पार्श्वभूमीवर अमेरिका, इराण आणि इस्रायलच्या पुढील पावलं काय असतील, याकडे संपूर्ण जगाचं लक्ष लागून राहणार आहे.
