Iran nuclear sites strike : इराणने अणुशक्ती बनू नये, खामेनींचे राजवट संपली पाहिजे... इस्रायलने युद्धाचा उद्देश सांगितला ( फोटो सौजन्य : सोशल मीडिया)
Iran nuclear sites strike : पश्चिम आशियातील तणाव अधिक गडद होत चालला असून, इस्रायलने इराणविरुद्ध सुरू केलेल्या हल्ल्यांमागचे आपले अंतिम उद्दिष्ट जगासमोर स्पष्ट केले आहे. भारतातील इस्रायली राजदूत रुवेन अझर यांनी एका वृत्तवाहिनीशी बोलताना सांगितले की, इराणच्या अणु प्रतिष्ठानांचा पूर्ण नाश आणि आयातोल्ला अली खामेनी यांच्या नेतृत्वाखालील सत्तेची समाप्ती हेच या युद्धाचे अंतिम लक्ष्य आहे.
या युद्धात अमेरिका सक्रियपणे सहभागी झाल्यानंतर इस्रायलच्या भूमिकेत मोठा आत्मविश्वास दिसून येत आहे. अमेरिकेचे अध्यक्ष डोनाल्ड ट्रम्प यांनीही स्पष्ट केले आहे की, “इराण कधीही अण्वस्त्रधारी राष्ट्र होऊ देणार नाही.” यावरून हे युद्ध आणखी गंभीर व दीर्घकालीन होण्याची चिन्हे दिसत आहेत.
राजदूत रुवेन अझर यांनी स्पष्ट केले की, “इराणचा अण्विक कार्यक्रम संपूर्ण पश्चिम आशियासाठी आणि विशेषतः इस्रायलसाठी धोका ठरतो. त्यामुळे जोपर्यंत अणुसंयंत्रांचा पूर्ण नाश होत नाही, तोपर्यंत आमचे हल्ले सुरूच राहतील.” त्यांनी हेही नमूद केले की, या युद्धाचा मुख्य उद्देश केवळ तात्पुरता आघात करण्याचा नसून, इराणची सत्ताधारी व्यवस्था पूर्णपणे नष्ट करणे आहे.
जागतिक घडामोडी संबंधित बातम्या वाचण्यासाठी येथे क्लिक करा : Trump Iran strikes : गुप्तचर यंत्रणेत झाली मोठी चूक? अमेरिकेने जिथे बॉम्ब टाकला होता तिथून इराणने आधीच…
या संवादात भारताची शांततेसाठीची भूमिका अधोरेखित करण्यात आली. रुवेन अझर म्हणाले, “भारताचे पंतप्रधान नरेंद्र मोदी, संरक्षण मंत्री आणि राष्ट्रीय सुरक्षा सल्लागार इस्रायली नेतृत्वाशी नियमित संपर्कात आहेत. भारत हा एक असा देश आहे जो या भागात शांतता प्रस्थापित करण्यात मोठी भूमिका बजावू शकतो.”
भारतीय नागरिकांच्या सुरक्षेबाबत त्यांनी सांगितले की, “इस्रायलमध्ये राहणारे भारतीय पूर्णपणे सुरक्षित आहेत. आमच्याकडे बंकर आणि सुरक्षित आश्रयस्थाने आहेत, आणि भारतीयांना तेथे हलवण्यात आले आहे. हवाई क्षेत्र बंद झाल्यामुळे भारतात परत जाण्याचा मार्ग बंद झाला असला तरी, आम्ही जॉर्डनसारख्या देशांमार्गे त्यांच्या सुरक्षित परतीसाठी प्रयत्नशील आहोत.”
अमेरिकेचे अध्यक्ष डोनाल्ड ट्रम्प यांनीही इराणविरुद्ध कडक भूमिका घेतली आहे. त्यांनी सांगितले की, “जर इराणने शांतता करार नाकारला, तर आम्ही त्यांच्या अधिक सैनिकी तळांवर हल्ले करू. हे हल्ले ‘अत्यंत मोठे’ असतील आणि ‘फक्त काही मिनिटांत’ केले जातील.” याआधी झालेल्या हवाई हल्ल्यांनंतर ट्रम्प यांनी त्यांना “मोठे यश” म्हटले होते. आता हे स्पष्ट झाले आहे की अमेरिका आणि इस्रायल दोघेही इराणच्या अणु कार्यक्रमाचा अंत करण्यास कटिबद्ध आहेत.
युद्धाचे हे स्वरूप पाहता आंतरराष्ट्रीय पातळीवर चिंता वाढत आहे. मानवाधिकार संघटना आणि काही देशांनी या संघर्षाने आणखी भयानक रूप धारण करू शकते, अशी भीती व्यक्त केली आहे. विशेषतः इराणच्या अंतर्गत अस्थिरतेचा फायदा घेत या संघर्षाचा विपरित परिणाम संपूर्ण पश्चिम आशियावर होण्याची शक्यता वर्तवली जात आहे.
जागतिक घडामोडी संबंधित बातम्या वाचण्यासाठी येथे क्लिक करा : IAEA on US-Iran strike : अमेरिकेने इराणच्या अणुऊर्जा केंद्रावर केलेल्या हल्ल्यानंतर रेडिएशनची पातळी किती?? IAEA चे निवेदन जारी
इराण आणि इस्रायल यांच्यातील संघर्ष आता केवळ तात्कालिक सर्जिकल स्ट्राईकपुरता मर्यादित राहिलेला नाही. तो एक दीर्घकालीन, धोरणात्मक युद्धामध्ये परिवर्तित झाला आहे. इस्रायलचा स्पष्ट उद्देश अण्वस्त्रांचा नाश आणि खामेनी राजवटीचा अंत ही गोष्ट युद्धाला आणखी गती देऊ शकते. या पार्श्वभूमीवर भारतासारख्या देशांची शांततेसाठीची भूमिका आणखी महत्त्वाची ठरणार आहे.
