Share Market Closing Bell: सलग सातव्या दिवशी बाजार तेजीत, सेन्सेक्स 6 महिन्यांनंतर पुन्हा 80 हजारांच्या पुढे; आयटी शेअर्स चमकले (फोटो सौजन्य - सोशल मीडिया)
Share Market Closing Bell Marathi News: जागतिक बाजारांकडून मिळालेल्या सकारात्मक संकेतांमुळे, भारतीय शेअर बाजार बुधवारी (२३ एप्रिल) सलग सातव्या व्यापार सत्रात वाढीसह बंद झाला. सहा महिन्यांनंतर बेंचमार्क इंडेक्स सेन्सेक्सने पुन्हा एकदा ८० हजारांचा टप्पा ओलांडला. निफ्टी-५० देखील २४,३०० च्या वर बंद झाला. एचसीएल टेकच्या नेतृत्वाखालील बीएसई आयटी निर्देशांकात जवळपास ४ टक्के वाढ झाल्याने बाजाराला चालना मिळाली.
बुधवारी ३० शेअर्सचा बीएसई सेन्सेक्स ८०,१४२.०९ अंकांवर जोरदार वाढीसह उघडला. व्यवहारादरम्यान तो ८०,२५४.५५ अंकांवर पोहोचला होता. शेवटी, सेन्सेक्स ५२०.९० अंकांनी किंवा ०.६५ टक्क्याने वाढून ८०,११६.४९ अंकांवर बंद झाला.
नॅशनल स्टॉक एक्सचेंज (NSE) चा निफ्टी-५० देखील २४,३०० च्या वर जोरदार वाढीसह उघडला. व्यवहारादरम्यान तो २४,३५९.३० अंकांच्या उच्चांकी पातळीवर पोहोचला. शेवटी, निफ्टी १६१.७० अंकांनी किंवा ०.६७ टक्क्याने वाढून २४,३२८.९५ वर बंद झाला.
सेन्सेक्समधील ३० कंपन्यांपैकी २४ कंपन्यांचे शेअर्स हिरव्या रंगात तर सहा कंपन्यांचे शेअर्स लाल रंगात बंद झाले. एचसीएल टेकच्या शेअर्समध्ये सर्वात जास्त वाढ दिसून आली. आयटी कंपनीचे शेअर्स ८% ने वधारले. जानेवारी-मार्च तिमाहीतील चांगल्या निकालांमुळे कंपनीच्या शेअर्समध्ये ही वाढ झाली आहे. याशिवाय, टेक महिंद्रा, इन्फोसिस, टाटा मोटर्स, टीसीएस, महिंद्रा अँड महिंद्रा, सन फार्मा, टाटा स्टील, भारती एअरटेल, मारुती, नेस्ले इंडिया, एल अँड टी हे प्रमुख वधारलेले कंपन्यांचे शेअर होते.
सहा महिन्यांनंतर बीएसई सेन्सेक्सने पुन्हा एकदा ८० हजारांचा टप्पा ओलांडला. २५ ऑक्टोबर २०२५ रोजी सेन्सेक्स ६६३ अंकांनी किंवा ०.८ टक्क्यांनी घसरून ७९,४०२ वर बंद झाला होता. गेल्या पाच व्यवहार सत्रांमध्ये सेन्सेक्स ४% पेक्षा जास्त वाढला आहे.
त्याच वेळी, आशियाई बाजारपेठेत दिलासादायक वाढ दिसून आली. याचे कारण वॉल स्ट्रीटकडून मिळालेले सकारात्मक संकेत होते. अमेरिकेचे अध्यक्ष डोनाल्ड ट्रम्प चीनसोबतचे व्यापार युद्ध कमी करतील या अपेक्षेने आशियाई बाजार तेजीत होते. जपानचा निक्केई १.५८ टक्क्यांनी वधारला, तर दक्षिण कोरियाचा कोस्पी १.१२ टक्क्यांनी वधारला.
मंगळवारी अमेरिकन शेअर बाजारातही जोरदार तेजी दिसून आली. एस अँड पी ५०० निर्देशांक २.५१ टक्क्यांनी वाढला, तर नॅस्डॅक कंपोझिट आणि डाऊ जोन्स इंडस्ट्रियल सरासरी अनुक्रमे २.७१ टक्के आणि २.६६ टक्क्यांनी घसरले.
फेडरल रिझर्व्हचे अध्यक्ष जेरोम पॉवेल यांना काढून टाकण्याचा त्यांचा कोणताही हेतू नसल्याचे ट्रम्प यांनी म्हटले आहे. तथापि, ते दर कमी करून विकासाला चालना देण्याची मागणी मध्यवर्ती बँकेकडे करत आहेत. यामुळे अमेरिकन बाजारपेठेत सकारात्मक संकेत मिळाला.
मंगळवारी बीएसई सेन्सेक्स १८७ अंकांनी किंवा ०.२४ टक्क्यांनी वाढून ७९,५९५ वर बंद झाला. तर निफ्टी-५० ४१ अंकांनी किंवा ०.१७ टक्क्यांनी वाढीसह २४,१६७ वर बंद झाला. मंगळवारी सलग पाचव्या दिवशी एफआयआयने ₹१,२९०.४३ कोटी किमतीचे शेअर्स खरेदी केले, तर डीआयआयने ₹८८५.६३ कोटी किमतीचे शेअर्स विकले.
.png "Videos"){kind=small}
