२१ सप्टेंबरची असाक्षरांची चाचणी पुढे ढकलण्याची मागणी! “धार्मिक संवेदनांचा आदर…”

महाराष्ट्र राज्य प्राथमिक शिक्षक समितीने नवभारत साक्षरता अभियानाअंतर्गत २१ सप्टेंबरची असाक्षरांची चाचणी पितृमोक्ष अमावस्येमुळे पुढे ढकलण्याची मागणी केली आहे.

नवभारत साक्षरता अभियानाअंतर्गत २१ सप्टेंबर रोजी होणारी असाक्षरांची चाचणी पितृमोक्ष अमावस्या (सर्वपित्री अमावस्या) मुळे पुढे ढकलण्याची मागणी महाराष्ट्र राज्य प्राथमिक शिक्षक समितीने केली आहे. समितीचे राज्याध्यक्ष विजय कोंबे, सरचिटणीस राजन कोरगावकर, राज्य नेते उदय शिंदे आणि इतर पदाधिकारी यांनी राज्याचे शिक्षण आयुक्त तसेच शिक्षण विभागाचे इतर अधिकारी यांच्याकडे निवेदन सादर केले आहे. यासोबतच, अमरावती जिल्हा शाखेनेही विभागीय शिक्षण संचालकांना यासंदर्भात निवेदन दिले असून, धार्मिक कार्यक्रमांमुळे उमेदवारांना परीक्षेत सहभागी होण्यात अडचणी येऊ नयेत, अशी मागणी समितीने केली आहे.

जवळपास एक हजार जणांना मिळणार नोकरी! पॉवर ग्रीड देत आहेत काम करण्याची संधी

पितृमोक्ष अमावस्या हा पितृपक्षाचा शेवटचा दिवस असून, या दिवशी पूर्वजांच्या स्मरणार्थ श्राद्ध, पिंडदान, तर्पण यांसारखे धार्मिक कार्य केले जाते. तसेच गरजू लोकांना अन्न, वस्त्र आणि इतर आवश्यक वस्तू दान करणे शुभ मानले जाते. या कृत्यामुळे पितृदोष नष्ट होतो, कुटुंबाला आशीर्वाद मिळतो आणि पूर्वजांना मोक्ष प्राप्त होतो, अशी धार्मिक मान्यता आहे. अनेक ग्रामीण व शहरी भागातील लोक या दिवशी आपल्या कुटुंबीयांसह पितृमोक्ष अमावस्यानिमित्त धार्मिक विधी पार पाडतात, ज्यामुळे त्या दिवशी चाचणीत सहभागी होणे काहींसाठी शक्य नसते.

नवभारत साक्षरता कार्यक्रम (NILP) हा भारत सरकारच्या शिक्षण मंत्रालयाद्वारे सुरू केलेला उपक्रम आहे. या कार्यक्रमाचा उद्देश १५ वर्षे वयापासून व त्याहून अधिक वयाच्या निरक्षर व्यक्तींना वाचन, लेखन तसेच जीवनावश्यक कौशल्ये शिकवणे हा आहे. कार्यक्रमामध्ये सहभागी झालेल्या व्यक्तींना विविध चाचण्या घेऊन प्रमाणपत्र दिले जाते, जे त्यांच्या साक्षरतेचे आणि शैक्षणिक कौशल्याचे प्रमाण मानले जाते. यामुळे निरक्षर व्यक्तींना समाजात आत्मविश्वास मिळतो तसेच त्यांचे जीवनमान सुधारण्यास मदत होते.

शासनाकडून दिलासा! पोलीस होण्याचा आहे मनसुबा? ‘या’ उमेदवारांना देण्यात आली मुभा 

समितीच्या मते, धार्मिक आणि सामाजिक कारणांमुळे २१ सप्टेंबरची चाचणी आयोजित करणे अनेक उमेदवारांसाठी कठीण होईल. त्यामुळे चाचणीची तारीख पुढे ढकलल्यास अधिकाधिक उमेदवार परीक्षेत सहभागी होऊ शकतील. समितीने या मागणीसाठी शैक्षणिक अधिकार्‍यांकडे अधिकृत निवेदन सादर केले असून, त्यात परीक्षेच्या तारखेच्या बदलाचे औचित्य स्पष्ट केले आहे. या मागणीमुळे केवळ धार्मिक संवेदनांचा आदर होणार नाही तर नवसाक्षर व्यक्तींना शिक्षणात संधी मिळेल, असा समितीचा दावा आहे.