फोटो सौजन्य - Social Media
आयटी क्षेत्रातील आघाडीची बहुराष्ट्रीय कंपनी मायक्रोसॉफ्टने पुन्हा एकदा मोठ्या प्रमाणावर कर्मचाऱ्यांना कामावरून कमी करण्याचा निर्णय घेतला आहे. या निर्णयानुसार सुमारे ९१०० कर्मचाऱ्यांना कामावरून कमी केलं जाणार असून, ही संख्या कंपनीच्या एकूण कर्मचाऱ्यांपैकी सुमारे ४ टक्के आहे. काही सुत्रांच्या अहवालानुसार, ही छंटनी २०२३ नंतरची सर्वात मोठी मानली जात आहे.
मायक्रोसॉफ्टकडे जून २०२४ पर्यंत जगभरात सुमारे २.२८ लाख कर्मचारी कार्यरत होते. या नव्या निर्णयामुळे मोठ्या संख्येने कर्मचाऱ्यांवर परिणाम होणार आहे. विशेष म्हणजे, यावेळी छंटनी केवळ टेक्निकल टीमपर्यंत मर्यादित नसून मुख्यतः सेल्स आणि मार्केटिंग विभागांवर परिणाम होणार आहे. या विभागात सध्या ४५,००० हून अधिक कर्मचारी कार्यरत आहेत, जे कंपनीच्या एकूण मनुष्यबळाचा मोठा हिस्सा आहे.
ही छंटनी कंपनीच्या वाढत्या खर्चावर नियंत्रण मिळवण्यासाठी करण्यात येत आहे. अमेरिकेसह अनेक आघाडीच्या कंपन्यांनी मागील काही काळात अशाच प्रकारे छंटनी करत आर्थिक अनिश्चिततेशी सामना करण्याचा प्रयत्न केला आहे. मायक्रोसॉफ्टने यापूर्वी मे २०२५ मध्ये ६,००० कर्मचाऱ्यांना कामावरून कमी केलं होतं, तर जून २०२५ च्या सुरुवातीला आणखी ३०० कर्मचाऱ्यांवर ही कुरघोडी झाली होती. या दोन्ही छंटनींसाठी कंपनीकडून स्थानिक प्रशासनास नोटिसाही देण्यात आल्या होत्या.
याशिवाय एप्रिल २०२५ मध्ये मायक्रोसॉफ्टने सूचित केलं होतं की, लहान व मध्यम व्यवसायांसाठी सॉफ्टवेअर विक्रीचं काम थर्ड पार्टी एजन्सीकडे दिलं जाईल. त्यामुळेच सेल्स विभागातील कर्मचाऱ्यांची भूमिका धोक्यात येणार हे संकेत आधीच मिळाले होते. सुत्रांकडून आलेल्या माहितीनुसार, कंपनीने याआधीही विक्री विभागातील कर्मचाऱ्यांची संख्या मोठ्या प्रमाणावर घटवण्याचा निर्णय घेतला होता. अद्याप या नव्या छंटनीबाबत मायक्रोसॉफ्टकडून कोणतीही अधिकृत प्रतिक्रिया देण्यात आलेली नाही.
