Beed News: जनावरे चोरली, ट्रकमध्ये कोंबली अन् हरियाणाच्या दिशेने पलायन; बीडमध्ये पर्दाफाश
चोरीची जनावरे ट्रकमध्ये
कडा येथील गोपीनाथ काकडे यांच्या शेतातील गोठ्यातून तीन गायी चोरीला गेल्या होत्या. तसेच सांगवी पाटण येथील अशोक खिल्लारे यांची एक गाय आणि दत्तात्रय भोसले यांचा एक बैल चोरीला गेला होता. या घटनांचा तपास सुरू असतानाच चोरीची जनावरे एका खासगी ट्रकमधून हरियाणाच्या दिशेने नेली जात असल्याची माहिती पोलिसांना मिळाली.
पोलिसांचा थरारक पाठलाग
माहितीच्या आधारे पोलिसांनी संशयित ट्रकचा शोध सुरू केला. काही अंतरावर ट्रक दिसताच पोलिसांनी त्याचा पाठलाग केला. पोलिस पाठलाग करत असल्याचे लक्षात येताच चालकाने ट्रक वेगाने पळविण्याचा प्रयत्न केला. मात्र, पोलिसांनी पाठलाग सुरूच ठेवला. अखेर कापशी फाट्याजवळ ट्रक थांबला. यावेळी संशयितांनी अंधाराचा फायदा घेत पळून जाण्याचा प्रयत्न केला; मात्र पोलिसांनी परिसरात शोध घेऊन दोघांना ताब्यात घेतले.
हेही वाचा: Scam News: चांगल्या परताव्याचे आमिष दाखवून विश्वास जिंकला अन् 22 लाखांना गंडा घातला
हरियाणातील दोघे अटकेत
पोलिसांनी ताविद रोशन पठाण (वय ३८, रा. अडबार, जिल्हा नूह, हरियाणा) आणि अमजद सिखार खान (वय १९, रा. रामलगड, ता. पुन्हाना, जिल्हा नूह, हरियाणा) यांना अटक केली. ट्रकची तपासणी केली असता त्यामध्ये चोरीची जनावरे आढळून आली. ट्रकसह जनावरेही पोलिसांनी ताब्यात घेतली आहेत.
जनावरांना औषध लावल्याचा दावा
पोलिसांच्या चौकशीत चोरी केलेली जनावरे ट्रकमध्ये कोंबून नेली जात असल्याचे समोर आले. तसेच जनावरांना शांत ठेवण्यासाठी त्यांच्या तोंडाला औषध लावल्याचेही तपासात निष्पन्न झाल्याचे पोलिसांनी सांगितले आहे.
टोळीत आणखी किती जण?
या कारवाईत पोलिस हवालदार भाऊसाहेब आहेर, प्रभाकर खोले, अमोल नवले आणि चालक प्रताप घोडके यांनी सहभाग घेतला. या टोळीमध्ये आणखी किती जणांचा सहभाग आहे, तसेच यापूर्वी परिसरातून चोरीला गेलेल्या जनावरांशी या संशयितांचा संबंध आहे का, याचा तपास पोलिसांकडून सुरू आहे.
पशुपालकांनी दक्ष राहावे
या घटनेच्या पार्श्वभूमीवर पशुपालकांनी रात्रीच्या वेळी गोठ्यांमध्ये विशेष दक्षता घेण्याचे आवाहन करण्यात आले आहे. गोठ्याजवळ अनोळखी व्यक्ती किंवा संशयास्पद वाहन आढळल्यास तातडीने पोलिसांना माहिती द्यावी, असे आवाहन पोलिसांनी केले आहे.
.png "Videos"){kind=small}
