नंदुरबारमध्ये ईदच्या जूलुसवेळी तुंबळ हाणामारी; दंगल परिस्थितीवर पोलिसांची करडी नजर  

मुहम्मद पैगंबर यांची जयंती सर्वत्र साजरी करण्यात आली. मात्र ईदच्या जुलूसवेळी नंदुरबारमध्ये दोन गटामध्ये वाद निर्माण झाला. आणि तुंबळ हाणामारी झाली. याचे व्हिडिओ आणि फोटो देखील काढण्यात आले. दंगल सदृश्य परिस्थिती नियंत्रणामध्ये आणण्यामध्ये नंदुरबार पोलिसांना यश आले आहे. मात्र अफवा पसरवण्यावर कडक कारवाई करण्याचे निर्देश जिल्हा पोलीस अधीक्षकांकडून देण्यात आले आहे.

नंदुरबार : राज्यभरामध्ये पैगंबर जयंती मुस्लीम बांधवांकडून उत्साहामध्ये साजरी करण्यात आली. मात्र नंदूरबारमध्ये ईदला गालबोट लागल्याची घटना घडली आहे. ईदच्या जूलुस दरम्यान दोन गटात तुंबऴ हाणामारी झाली. यामुळे दंगल परिस्थिती निर्माण झाली होती. या घटनेमुळे नंदुरबारमध्ये तणाव आणि भीतीचे वातावरण  निर्माण झाले होते. मात्र पोलिसांनी आता परिस्थिती नियंत्रणामध्ये आणली असून परिसरावर लक्ष ठेवण्यात आले आहे.

पैगंबर जयंतीनिमित्त आज नंदुरबार शहरात मिरवणूक काढण्यात आली होती. या दरम्यान दोन गटात वाद निर्माण झाल्याने शहरात तणाव निर्माण झाला. काही भागात मोठ्या प्रमाणात नुकसान झाले असून मोटरसायकलींची नासधूस करण्यात आली आहे. पोलिसांनी वेळीच हस्तक्षेप केल्यामुळे तणाव मिटला. आता नंदुरबार शहरात तणावपूर्ण शांतता असून मोठ्या संवेदनशील भागात मोठ्या प्रमाणात पोलीस बंदोबस्तान तैनात करण्यात आला आहे. नागरिकांनी कोणत्याही प्रकारच्या अफवांवर विश्वास ठेवू नये व सोशल मीडियाच्या माध्यमातून कोणीही अफवा पसरवू नये अफवा पसरवण्यावर कडक कारवाई करण्याचे निर्देश जिल्हा पोलीस अधीक्षक श्रवण दत्त एस यांनी दिले आहेत.