Crime News: मोबाइलवरून ओळख; भेटण्यास नकार दिला, रात्री मागच्या दाराने घरात घुसून धक्कादायक कृत्य

मोबाइलवरून सुरू झालेली ओळख पुढे गंभीर वळणावर पोहोचली. भेटण्यास नकार दिल्यानंतर रात्री थेट महिलेच्या घरात शिरलेल्या तरुणाने धमकी देत जबरदस्ती केल्याचा आरोप आहे.

• भेटण्यास नकार दिल्यानंतर रात्री मागच्या दाराने घरात शिरल्याचा आरोप
• पती-सासऱ्यांना जीवे मारण्याची धमकी देत महिलेवर जबरदस्ती
• २२ वर्षीय तरुणावर गुन्हा दाखल

छत्रपती संभाजीनगर:  मोबाइलवरून झालेली ओळख, त्यानंतर फोन आणि संदेशांमधून संवाद आणि पुढे भेटण्याचा आग्रह… मात्र, महिलेने भेटण्यास नकार दिल्यानंतर तरुणाने थेट रात्री तिच्या घरात प्रवेश केल्याचा धक्कादायक प्रकार रांजणगाव शेणपुंजी परिसरात समोर आला आहे. घरात प्रवेश केल्यानंतर बेडरूमचा दरवाजा बंद करून पती आणि सासऱ्यांना जीवे मारण्याची धमकी देत महिलेवर जबरदस्ती केल्याचा आरोप आहे. या प्रकरणी सचिन अनिल राठोड (वय २२) याच्याविरुद्ध वाळूज एमआयडीसी पोलिस ठाण्यात शनिवारी गुन्हा दाखल करण्यात आला. पोलिसांनी दिलेल्या माहितीनुसार, सचिन राठोड हा काही वर्षांपूर्वी फिर्यादी महिलेच्या घराच्या परिसरात राहत होता. त्यामुळे दोघांची पूर्वीपासून ओळख होती. या ओळखीमुळे दोघांमध्ये मोबाइलवरून बोलणे तसेच संदेशांची देवाणघेवाण होत होती. दरम्यान, महिलेच्या सासऱ्यांच्या लक्षात ही बाब आल्यानंतर त्यांनी सचिनला परिसरातून निघून जाण्यास सांगितले होते.

भेटण्याचा आग्रह, मात्र महिलेचा नकार

१० सप्टेंबर रोजी सचिनने महिलेला फोन केला. त्याने महिलेला भेटण्याची इच्छा व्यक्त केली. मात्र, महिलेने त्याला भेटण्यास स्पष्टपणे नकार दिला. त्यानंतरही त्याने तिच्याशी संपर्क साधण्याचा प्रयत्न केल्याचे तक्रारीत नमूद करण्यात आले आहे. त्याच रात्री सुमारे ११ वाजण्याच्या सुमारास महिलेच्या घराच्या मागील बाजूच्या दरवाजावर आवाज झाला. आवाज ऐकून महिलेने दरवाजा उघडला असता सचिन घरात आल्याचे तक्रारीत म्हटले आहे. तो घरात कशाप्रकारे आला, याबाबत पोलिसांकडून तपास केला जात आहे.

बेडरूमचा दरवाजा बंद करून धमकी

घरात प्रवेश केल्यानंतर आरोपीने बेडरूमचा दरवाजा बंद केला. महिलेने आरडाओरड केल्यास तिच्या पतीसह सासऱ्यांना जीवे मारण्याची धमकी दिल्याचा आरोप आहे. या धमकीमुळे घाबरलेल्या महिलेवर आरोपीने जबरदस्ती केल्याचे तक्रारीत नमूद करण्यात आले आहे. घटनेनंतर महिलेने वाळूज एमआयडीसी पोलिस ठाण्यात धाव घेत तक्रार दाखल केली. महिलेच्या तक्रारीवरून पोलिसांनी सचिन अनिल राठोड याच्याविरुद्ध गुन्हा दाखल केला आहे. या प्रकरणाचा पुढील तपास वाळूज एमआयडीसी पोलिस करीत असून, तक्रारीतील आरोपांची पडताळणी तसेच घटनेशी संबंधित अन्य बाबींचा तपास सुरू आहे.