मोठी बातमी ! आमदार अमित गोरखे यांच्या वाहनाला नाशिकमध्ये अपघात; दोन वाहनांमध्ये झाली धडक
पिंपरी : अनुसूचित जातींच्या (SC) आरक्षणाच्या उपवर्गीकरणाच्या मागणीसाठी नाशिक येथे आयोजित करण्यात आलेल्या महामोर्चासाठी गेलेले विधान परिषद आमदार अमित गोरखे यांच्या वाहनाला सोमवारी (दि.21) अपघात झाला. या अपघातात गोरखे यांच्या मानेला किरकोळ दुखापत झाली असून, त्यांच्यासह वाहनातील सर्वजण सुखरूप आहेत.
आरक्षणाच्या उपवर्गीकरणाच्या मागणीसाठी नाशिकमध्ये महामोर्चाचे आयोजन करण्यात आले होते. या मोर्चाला आमदार गोरखे उपस्थित होते. मोर्चानंतरच्या दौऱ्यादरम्यान त्यांच्या वाहनाची दुसऱ्या वाहनाशी धडक झाली. अपघातानंतर गोरखे यांना तातडीने प्राथमिक वैद्यकीय उपचार देण्यात आले. त्यांची प्रकृती स्थिर असून, चिंतेचे कोणतेही कारण नसल्याचे सांगण्यात आले. वाहनातील सहप्रवासी, चालक आणि सुरक्षा रक्षक यांनाही कोणतीही गंभीर दुखापत झालेली नाही.
एससी आरक्षणाच्या उपवर्गीकरणाच्या मुद्द्यावर आमदार गोरखे यांनी यापूर्वीही विविध व्यासपीठांवरून भूमिका मांडली आहे. त्यांच्या वाहनाला अपघात झाल्याची माहिती समोर आल्यानंतर कार्यकर्त्यांमध्ये काही काळ चिंता निर्माण झाली होती. मात्र, गोरखे यांच्यासह सर्वजण सुरक्षित असल्याचे स्पष्ट झाल्यानंतर कार्यकर्त्यांनी सुटकेचा नि:श्वास सोडला.
दोन वाहनांमध्ये झाली धडक
आमदार अमित गोरखे यांच्या वाहनाची दुसऱ्या वाहनाशी धडक झाली. या वाहनामध्ये आमदार अमित गोरखे यांच्यासोबत मारुती जाधव, बाबासाहेब रसाळ, आनंद सुतार, महेश खंदारे तसेच वाहन चालक रामचंद्र जाधव, अंगरक्षक सूरज आणि अभिजीत उपस्थित होते. या अपघातात आमदार अमित गोरखे हे थोडक्यात बचावल्याची माहिती आहे.
काही काळ गोंधळाचे वातावरण
अपघातानंतर घटनास्थळी काही काळ गोंधळाचे वातावरण निर्माण झाले. मात्र, आरक्षण उपवर्गीकरणाच्या समर्थनार्थ आयोजित मोर्चासाठी जात असताना ही घटना घडल्याने उपस्थित कार्यकर्त्यांमध्ये चिंता व्यक्त करण्यात आली.
.png "Videos"){kind=small}
