Pune Crime: गणेशोत्सवाच्या तोंडावर FDA ॲक्शन; चार ट्रक पनीर-खव्याचा मोठा साठा जप्त, तुकाराम मुंढेंच्या ॲक्शनने धुमाकूळ

गणेशोत्सवाच्या तोंडावर खाद्यपदार्थांच्या भेसळीविरोधात अन्न व औषध प्रशासनाने पुण्यात मोठी कारवाई केली आहे. पनीर आणि खव्याचे तब्बल चार ट्रक ताब्यात घेऊन त्यांचे नमुने तपासणीसाठी पाठवण्यात आले आहेत

• गणेशोत्सवाआधी पनीर-खव्याचा मोठा साठा जप्त
• चार ट्रकमधील खाद्यपदार्थांचे नमुने तपासणीसाठी
• साठा कुठून आला, पुरवठा कुठे होणार होता? FDAचा तपास

Pune FDA Action: गणेशोत्सवाला अवघे काही दिवस शिल्लक असताना अन्न व औषध प्रशासनाने  पुण्यात मोठी कारवाई केली आहे. सणासुदीच्या काळात मिठाई, पनीर, खवा आणि विविध दुग्धजन्य पदार्थांची मागणी मोठ्या प्रमाणात वाढते. या पार्श्वभूमीवर भेसळयुक्त किंवा निकृष्ट दर्जाचे खाद्यपदार्थ बाजारात येऊ नयेत, यासाठी एफडीए कडून तपासणी मोहीम हाती घेण्यात आली आहे. या मोहिमे दरम्यान पुण्यात तब्बल चार ट्रक पनीर आणि खव्याचा साठा जप्त करण्यात आला आहे.

एफडीए कारवाई

एफडीएच्या पथकाने केलेल्या कारवाईत मोठ्या प्रमाणात पनीर आणि खवा ताब्यात घेण्यात आला. एवढ्या मोठ्या प्रमाणात खाद्यपदार्थांचा साठा आढळून आल्याने संबंधित ठिकाणी प्रशासनाची कारवाई चर्चेचा विषय ठरली आहे. कारवाईसाठी एफडीएचे अधिकारी आणि कर्मचाऱ्यांचे पथक घटनास्थळी दाखल झाले होते. गणेशोत्सवाच्या काळात मिठाई तसेच दुग्धजन्य पदार्थांना मोठी मागणी असते. त्यामुळे व्यापारी आणि खाद्यपदार्थ विक्रेत्यांकडून या पदार्थांचा मोठ्या प्रमाणावर साठा केला जातो. मात्र, मागणी वाढलेल्या काळात निकृष्ट दर्जाचे किंवा नियमांचे उल्लंघन करणारे पदार्थ बाजारात आणले जाण्याची शक्यता असते. त्यामुळे नागरिकांच्या आरोग्याच्या दृष्टीने एफडीएची ही तपासणी मोहीम महत्त्वाची मानली जात आहे.

हेही वाचा: Pune: गणेशोत्सवासाठी पुणे पोलिसांचा कडक बंदोबस्त; १४ ते २५ सप्टेंबरपर्यंत तीन भागांत मद्यविक्रीवर निर्बंध

भेसळ आहे की नाही अहवालात स्पष्ट

 जप्त करण्यात आलेल्या पनीर आणि खव्याचे नमुने एफडीएच्या अधिकाऱ्यांनी तपासणीसाठी घेतले आहेत. हे नमुने प्रयोगशाळेत पाठवण्यात येणार असून, संबंधित खाद्यपदार्थ निर्धारित गुणवत्ता निकषांनुसार आहेत का, याची तपासणी केली जाणार आहे. त्यामुळे या पदार्थांमध्ये भेसळ आहे किंवा नाही, हे प्रयोगशाळेच्या अहवालानंतरच स्पष्ट होणार आहे. यासोबतच एवढ्या मोठ्या प्रमाणात असलेला खाद्यपदार्थांचा साठा नेमका कुठून आणण्यात आला, त्याचा पुरवठा कोणत्या ठिकाणी केला जाणार होता, संबंधितांकडे आवश्यक परवाने आहेत का, तसेच साठवणुकीसाठी नियमांचे पालन करण्यात आले होते का, याचाही एफडीएकडून तपास सुरू आहे.

चार ट्रक पनीर, खवा जप्त

प्रयोगशाळेच्या अहवालानंतर पुढील कारवाई केली जाणार आहे. त्यामुळे सध्या चार ट्रक पनीर आणि खवा जप्त करण्यात आल्याचे स्पष्ट झाले असून, त्यातील पदार्थांची गुणवत्ता आणि भेसळीबाबत अंतिम निष्कर्ष अहवालानंतरच समोर येणार आहे. गणेशोत्सवाच्या काळात नागरिक मोठ्या प्रमाणावर मिठाई आणि दुग्धजन्य पदार्थांची खरेदी करतात. त्यामुळे खाद्यपदार्थांच्या गुणवत्तेबाबत प्रशासनाकडून विशेष खबरदारी घेतली जात आहे. सणासुदीच्या काळात एफडीएची तपासणी आणि कारवाई आणखी तीव्र होण्याची शक्यता असून, विक्रेते आणि व्यावसायिकांमध्येही सतर्कता वाढली आहे. नागरिकांनी पनीर, खवा, मिठाई आणि इतर दुग्धजन्य पदार्थ खरेदी करताना पॅकिंग, उत्पादनाची तारीख, गुणवत्ता आणि विक्रेत्याची विश्वासार्हता तपासावी, असे आवाहन प्रशासनाकडून करण्यात येत आहे.