सांगली: तीन दिवस उपचार, डिस्चार्जनंतर पुन्हा प्रकृती बिघडली; शासकीय रुग्णालयात पती-पत्नीचा मृत्यू

तीन दिवसांच्या उपचारानंतर प्रकृतीत सुधारणा झाल्याने पती-पत्नीला रुग्णालयातून डिस्चार्ज देण्यात आला. मात्र, घरी परतल्यानंतर दुसऱ्याच दिवशी पुन्हा प्रकृती बिघडली आणि उपचारासाठी रुग्णालयात दाखल केल्यानंतर दोघांचाही एकाच दिवशी मृत्यू झाला.

• मिरज शासकीय रुग्णालयात एकाच दिवशी मृत्यू
• डिस्चार्ज नंतर पुन्हा प्रकृती खालावली
• दुसऱ्या उपचारादरम्यान मृत्यूची प्राथमिक माहिती

सांगली: तीन दिवस उपचार घेतल्यानंतर प्रकृतीत सुधारणा झाल्याने रुग्णालयातून डिस्चार्ज मिळाल्यानंतर घरी परतलेल्या पती-पत्नीची दुसऱ्याच दिवशी प्रकृती पुन्हा बिघडली. त्यांना तातडीने रुग्णालयात दाखल करण्यात आले; मात्र, उपचारादरम्यान दोघांचाही एकाच दिवशी मृत्यू झाला. ही हृदयद्रावक घटना सांगली जिल्ह्यातील पलूस येथे घडली. मनीषा संजय पाटील (वय ४२) आणि संजय तात्यासो पाटील (वय ४६) अशी मृतांची नावे आहेत. प्राथमिक माहितीनुसार, दोघांनी २ सप्टेंबर रोजी विषारी पदार्थाचे सेवन केले होते. कर्जाच्या त्रासामुळे त्यांनी हे पाऊल उचलल्याची माहिती समोर येत असून, पोलिसांकडून त्याची पडताळणी सुरू आहे.

विषारी पदार्थाचे सेवन

मिळालेल्या माहितीनुसार, संजय पाटील आणि त्यांच्या पत्नी मनीषा यांनी २ सप्टेंबर रोजी विषारी पदार्थाचे सेवन केले. त्यानंतर प्रकृती बिघडल्याने नातेवाईकांनी दोघांना पलूस येथील ग्रामीण रुग्णालयात दाखल केले. प्राथमिक उपचार केल्यानंतर त्यांची प्रकृती चिंताजनक असल्याने पुढील उपचारासाठी त्यांना सांगलीतील शासकीय रुग्णालयात हलविण्यात आले.

हेही वाचा: Mumbai Crime: ९९ रुपयांच्या आमिषात ७३ हजारांचा चुना! बनावट Facebook पेजद्वारे महिलेची फसवणूक

डिस्चार्ज नंतर पुन्हा प्रकृती खालावली

सांगलीतील शासकीय रुग्णालयात दोघांवर तीन दिवस उपचार सुरू होते. उपचाराला प्रतिसाद मिळाल्याने प्रकृतीत सुधारणा झाली. त्यामुळे डॉक्टरांनी ५ सप्टेंबर रोजी दुपारी दोघांना डिस्चार्ज दिला. त्यानंतर ते घरी परतले. मात्र, घरी गेल्यानंतर दुसऱ्याच दिवशी दोघांनाही पुन्हा त्रास जाणवू लागला. रविवार, ६ सप्टेंबर रोजी सकाळी प्रकृती बिघडल्याचे लक्षात येताच नातेवाईकांनी त्यांना तातडीने पलूस ग्रामीण रुग्णालयात दाखल केले. तेथून पुढील उपचारासाठी दोघांना मिरज येथील शासकीय रुग्णालयात हलविण्यात आले. सकाळी सुमारे ११ वाजता त्यांना रुग्णालयात दाखल करण्यात आले. डॉक्टरांनी तपासणी केल्यानंतर मनीषा पाटील यांना उपचारापूर्वीच मृत घोषित केले. दुसरीकडे संजय पाटील यांची प्रकृती गंभीर असल्याने त्यांना अतिदक्षता विभागात दाखल करून उपचार सुरू करण्यात आले. मात्र, उपचारादरम्यान त्यांचाही मृत्यू झाला. एकाच दिवशी पती-पत्नीचा मृत्यू झाल्याने पाटील कुटुंबीयांवर मोठा आघात झाला आहे. या घटनेमुळे पलूस परिसरात हळहळ व्यक्त होत आहे.

Crime News: सांगलीत अंगावर काटा आणणारा अपघात; रस्त्यावर पडलेल्या तरुणाच्या अंगावरून मर्सिडीज गेली अन्…

दरम्यान, कर्जाच्या त्रासामुळे दोघांनी विषारी पदार्थाचे सेवन केल्याची प्राथमिक माहिती समोर आली असली, तरी या घटनेमागील नेमके कारण अद्याप स्पष्ट झालेले नाही. याप्रकरणी पलूस पोलीस ठाण्यात अकस्मात मृत्यूची नोंद करण्यात आली आहे. कर्जाचा तगादा, कौटुंबिक परिस्थिती तसेच अन्य कारणांबाबत पोलीस तपास करीत आहेत.