नायगावात ‘एक दुजे के लिए’; प्रियकरापाठोपाठ अल्पवयीन प्रेयसीचीही आत्महत्या

प्रियकरापाठोपाठ अल्पवयीन प्रेयसीनेही गळफास घेऊन आत्महत्या केल्याची घटना नायगाव पूर्वेला घडली आहे. या घटनेने मोठी खळबळ उडाली आहे.

वसई : प्रियकरापाठोपाठ अल्पवयीन प्रेयसीनेही गळफास घेऊन आत्महत्या केल्याची घटना नायगाव पूर्वेला घडली आहे. नायगाव पूर्वेकडील कोल्ही गावातील एका चाळीत राहणारा जितेंद्र वर्मा (वय २४) आणि छाया गुप्ता (वय १७) या दोघांचे प्रेमसंबध होते. जितेंद्र एका खासगी कंपनीत कामाला होता. तर छाया शिक्षण घेत होती. जितेंद्रला छायासोबत ‘लिव्ह इन रिलेशनशीप’ मध्ये रहायचे होते. त्यासाठी तो तिला आग्रह करत होता. मात्र छाया लहान असल्याने एकत्र राहण्यास
ती तयार नव्हती.

छाया शनिवारी जितेंद्रला भेटायला त्याच्या घरी गेली होती. त्यावेळी जितेंद्रने पुन्हा छायाला ‘लिव्ह इन रिलेशनशीप’ मध्ये राहण्याचा आग्रह केला. त्यावरून त्यांच्यात वादही झाला. जर छाया आपल्यासोबत राहिली नाही तर ती भविष्यात सोडून निघून जाईल, अशी जितेंद्रला भीती वाटत होती. त्यामुळे, तू लिव्ह इन रिलेशनशीपमध्ये रहा नाहीतर मी आत्महत्या करेन, असे तो तिला सांगत होता. परंतु छायाने त्याचे बोलणे गांभीर्याने घेतले नाही. अखेर निराश होऊन जितेंद्रने शुक्रवारी मध्यरात्री दीडच्या सुमारास घरातील लोखंडी अँगलला दोरी बांधून गळफास घेऊन आत्महत्या केली.

नैराश्येतून केली आत्महत्या

छायाला हा प्रकार समजताच तिला मोठा धक्का बसला. त्यामुळे ती नैराश्यात गेली. तिच्या कुटुंबियांनी तिला समजवण्याचा खूप प्रयत्न केला. मात्र ती या धक्क्यातून सावरली नाही. मी जितेंद्रचे ऐकले असते तर त्याचा जीव वाचला असता, असे तिला वाटत होते. त्या नैराश्यातून तिने रविवारी दुपारी साडेबाराच्या सुमारास घरातील लोखंडी अँगलला नायलॉनची दोरी बांधून तिनेही गळफास घेऊन आत्महत्या
केली.