Accident News: गणेशोत्सवाच्या प्रवासाला वरंधा घाटात अपघाताचे गालबोट; दोन कारचा चक्काचूर,तिघे गंभीर
तीव्र वळणावर भीषण धडक
मिळालेल्या प्राथमिक माहितीनुसार, अपघातातील एका कारमधून गणेशोत्सवासाठी प्रवासी कोकणाच्या दिशेने जात होते. मध्यरात्रीच्या सुमारास दोन्ही वाहने वरंधा घाटातील कोंढरी गावाच्या हद्दीत एका तीव्र वळणावर आली. घाटातील वळण, अंधार आणि समोरून येणाऱ्या वाहनाचा अंदाज न आल्याने दोन्ही कार एकमेकांसमोर आल्या आणि त्यांची जोरदार धडक झाली. धडक एवढी तीव्र होती की त्याचा मोठा आवाज परिसरात घुमला. अपघातानंतर दोन्ही वाहनांचे मोठे नुकसान झाले. विशेषतः कारच्या पुढील भागाचा पूर्णपणे चक्काचूर झाल्याचे घटनास्थळावरील चित्र होते. अपघातामुळे काही काळ मार्गावर भीतीचे वातावरण निर्माण झाले.
ग्रामस्थांनी केले मदतकार्य
अपघाताची माहिती मिळताच कोंढरी गावातील स्थानिक ग्रामस्थ आणि पोलिसांनी तातडीने घटनास्थळी धाव घेतली. जखमी प्रवाशांना वाहनांमधून बाहेर काढण्यासाठी मदतकार्य करण्यात आले. अपघातात तीन जण गंभीर जखमी झाले असून, त्यांना तातडीने रुग्णवाहिकेतून भोर येथील उपजिल्हा रुग्णालयात उपचारासाठी दाखल करण्यात आले आहे. अपघाताची नेमकी कारणे अद्याप स्पष्ट झालेली नसली, तरी प्रथमदर्शनी घाटातील तीव्र वळणावर वाहनांचा अंदाज न आल्याने ही दुर्घटना घडल्याचे समोर येत आहे. पोलिसांकडून या प्रकरणाचा पुढील तपास करण्यात येत आहे.
गणेशोत्सवामुळे घाटात वाहनांची गर्दी
गणेशोत्सवासाठी मोठ्या संख्येने नागरिक कोकणाकडे रवाना होत असल्याने भोर-महाड मार्गावर वाहनांची वर्दळ वाढली आहे. वरंधा घाटात अनेक ठिकाणी तीव्र वळणे असून रात्रीच्या वेळी दृश्यमानता कमी होते. त्यामुळे वाहनचालकांनी विशेष खबरदारी घेण्याची गरज आहे. गणेशोत्सवाच्या पार्श्वभूमीवर कोकणाकडे जाणाऱ्या वाहनांची संख्या वाढल्याने पोलिसांनी वाहनचालकांना घाटातील वळणांवर वेग कमी ठेवण्याचे आवाहन केले आहे. समोरून येणाऱ्या वाहनांचा अंदाज घेत सावधपणे वाहन चालवावे, ओव्हरटेक करणे टाळावे आणि रात्रीच्या प्रवासात विशेष काळजी घ्यावी, असेही पोलिसांकडून सांगण्यात आले आहे. सुदैवाने या अपघातात जीवितहानी टळली असली, तरी तीन प्रवासी गंभीर जखमी झाल्याने गणेशोत्सवाच्या पार्श्वभूमीवर घाटमार्गावरील सुरक्षित प्रवासाचा प्रश्न पुन्हा ऐरणीवर आला आहे.
.png "Videos"){kind=small}
