Awarapan 2: इमरान हाश्मीची ‘आवारापन 2’ ठरतेय हिटची दावेदार; पहिल्याच दिवशी 15-20 कोटींची कमाई शक्य

Awarapan 2: इमरान हाश्मी आणि दिशा पटानी यांच्या ‘आवारापन 2’ने बॉक्स ऑफिसवर दमदार सुरुवात केली आहे. 14 ऑगस्ट रोजी प्रदर्शित झालेल्या या चित्रपटाच्या अॅडव्हान्स बुकिंगला जबरदस्त प्रतिसाद मिळाला असून, सकाळच्या शोमध्येही प्रेक्षकांची मोठी गर्दी दिसत आहे.

• ‘आवारापन 2’ची बॉक्स ऑफिसवर धमाकेदार सुरुवात
• ‘बंटवारा 1947’पेक्षा 200% अधिक कमाईचा अंदाज
• ‘आवारापन 2’च्या तिकिटांना तुफान मागणी

Awarapan 2: इमरान हाश्मीच्या ‘आवारापन 2’ आणि सनी देओलच्या ‘बंटवारा 1947’ या दोन्ही चित्रपटांचा 14 ऑगस्ट रोजी थिएटरमध्ये सामना झाला आहे. स्वातंत्र्यदिनाच्या पार्श्वभूमीवर रिलीज झालेल्या या दोन्ही चित्रपटांपैकी सुरुवातीच्या अ‍ॅडव्हान्स बुकिंग आणि सकाळच्या शोच्या आकडेवारीत ‘आवारापन 2’ आघाडीवर असल्याचे चित्र आहे.

‘आवारापन 2’च्या अ‍ॅडव्हान्स बुकिंगला मोठा प्रतिसाद

उपलब्ध अ‍ॅडव्हान्स बुकिंगच्या आकडेवारीनुसार, ‘आवारापन 2’च्या 9,122 शोसाठी 2.85 लाखांहून अधिक तिकिटांची विक्री झाली. यातून सुमारे 8.57 कोटी रुपयांचा ग्रॉस महसूल मिळाला आहे. ब्लॉक केलेल्या सीट्सचा समावेश केल्यास हा आकडा सुमारे 11.36 कोटी रुपयांपर्यंत पोहोचतो. या सुरुवातीच्या प्रतिसादामुळे चित्रपटाच्या ओपनिंगबाबत मोठ्या अपेक्षा निर्माण झाल्या आहेत.

‘बंटवारा 1947’ अ‍ॅडव्हान्स बुकिंगमध्ये मागे

सनी देओल आणि प्रीती झिंटा यांच्या ‘बंटवारा 1947’ची अ‍ॅडव्हान्स बुकिंग तुलनेने कमी राहिली. चित्रपटाच्या 8,886 शोसाठी सुमारे 65,391 तिकिटांची विक्री झाली असून, त्यातून 1.76 कोटी रुपयांचा ग्रॉस कलेक्शन झाल्याचे आकडे सांगतात. ब्लॉक सीट्स धरून हा आकडा सुमारे 4.21 कोटी रुपये आहे. त्यामुळे अ‍ॅडव्हान्स बुकिंगमध्ये ‘आवारापन 2’ने ‘बंटवारा 1947’वर मोठी आघाडी घेतली आहे.

Bollywood Fashion: सिंपल लूक, जबरदस्त स्वॅग! हृतिक, टायगर ते टिमोथींचे स्टायलिश लूक्स

सकाळच्या शोमध्येही ‘आवारापन 2’ला पसंती

अ‍ॅडव्हान्स बुकिंगसोबतच सकाळच्या शोमध्येही इमरान हाश्मीच्या चित्रपटाला चांगला प्रतिसाद मिळत आहे. सकाळी 9 वाजताच्या शोमध्ये ‘आवारापन 2’च्या उपलब्ध सीट्सपैकी सुमारे 21 टक्के सीट्स बुक झाल्या होत्या. याउलट ‘बंटवारा 1947’च्या सकाळच्या शोमध्ये सुमारे 8 टक्के सीट्सवरच प्रेक्षकांची उपस्थिती दिसून आली. त्यामुळे सुरुवातीच्या टप्प्यात ‘आवारापन 2’ला जवळपास तिप्पट प्रेक्षक प्रतिसाद मिळत असल्याचे चित्र आहे.

19 वर्षांनंतर ‘आवारापन’ची कथा पुन्हा चर्चेत

2007 मध्ये प्रदर्शित झालेला ‘आवारापन’ सुरुवातीला बॉक्स ऑफिसवर अपेक्षित यश मिळवू शकला नव्हता. मात्र, कालांतराने या चित्रपटाला कल्ट क्लासिकचा दर्जा मिळाला. इमरान हाश्मीने साकारलेला शिवम पंडित हा व्यक्तिरेखा आणि चित्रपटातील संगीत प्रेक्षकांच्या विशेष पसंतीस उतरले. त्यामुळे तब्बल 19 वर्षांनंतर आलेल्या ‘आवारापन 2’बद्दल जुन्या चाहत्यांमध्ये विशेष उत्सुकता निर्माण झाली आहे.

‘आवारापन 2’ची 15 ते 20 कोटींची ओपनिंग?

अ‍ॅडव्हान्स बुकिंग, सकाळच्या शोमधील ऑक्युपन्सी आणि ऑन-साइट बुकिंगचा ट्रेंड पाहता ‘आवारापन 2’ पहिल्या दिवशी 15 ते 20 कोटी रुपयांची नेट कमाई करू शकते, असा अंदाज व्यक्त केला जात आहे. हा अंदाज खरा ठरल्यास इमरान हाश्मीच्या सोलो चित्रपटांमधील ही मोठी ओपनिंग ठरू शकते.

2007 च्या ‘आवारापन’पेक्षा पहिल्याच दिवशी मोठी कमाई?

2007 मध्ये प्रदर्शित झालेल्या मूळ ‘आवारापन’ने भारतात सुमारे 7.76 कोटी रुपयांचा लाइफटाइम नेट कलेक्शन केला होता, तर जगभरातील ग्रॉस कमाई सुमारे 13 कोटी रुपये होती. ‘आवारापन 2’ची सुरुवात सध्याच्या अंदाजाप्रमाणे झाली, तर पहिल्याच दिवशी सिक्वेल आपल्या मूळ चित्रपटाच्या लाइफटाइम कमाईच्या जवळपास किंवा त्यापेक्षा पुढे जाऊ शकतो.

‘बंटवारा 1947’ समोर मोठे आव्हान

राजकुमार संतोषी दिग्दर्शित ‘बंटवारा 1947’ हा फाळणीच्या पार्श्वभूमीवर आधारित चित्रपट आहे. सनी देओल, प्रीती झिंटा आणि शबाना आझमी यांच्या प्रमुख भूमिका आहेत. अ‍ॅडव्हान्स बुकिंगमध्ये चित्रपट मागे असला तरी 15 ऑगस्टचा राष्ट्रीय सण आणि त्यानंतरचा वीकेंड चित्रपटासाठी महत्त्वाचा ठरू शकतो. प्रेक्षकांकडून मिळणाऱ्या प्रतिक्रियांवर चित्रपटाची पुढील कमाई मोठ्या प्रमाणात अवलंबून राहणार आहे.

सनी देओलच्या मागील चित्रपटांच्या तुलनेत सुरुवात धीमी

सनी देओलच्या मागील काही चित्रपटांच्या तुलनेत ‘बंटवारा 1947’ची सुरुवात सध्या कमी दिसत आहे. ‘बॉर्डर 2’ने पहिल्या दिवशी 30 कोटी रुपये, तर ‘जाट’ने 9.50 कोटी रुपये नेट कमावले होते. सध्याच्या ट्रेंडनुसार ‘बंटवारा 1947’च्या पहिल्या दिवसाची कमाई 5 ते 8 कोटी रुपयांच्या आसपास राहण्याचा अंदाज आहे.

15 ऑगस्ट आणि वीकेंडचा फायदा कोणाला?

दोन्ही चित्रपटांसाठी आगामी शनिवार आणि रविवार अत्यंत महत्त्वाचे ठरणार आहेत. 15 ऑगस्टच्या सुट्टीमुळे थिएटरमधील प्रेक्षकसंख्या वाढण्याची शक्यता आहे. ‘आवारापन 2’ला सिक्वेल आणि जुन्या चाहत्यांचा फायदा मिळत असताना, ‘बंटवारा 1947’ला देशभक्ती आणि फाळणीच्या पार्श्वभूमीवरील कथानकाचा फायदा होऊ शकतो. मात्र, अंतिम चित्र स्पष्ट होण्यासाठी प्रेक्षकांचा प्रतिसाद आणि आगामी दिवसांतील बॉक्स ऑफिस कलेक्शन महत्त्वाचे ठरणार आहे.

Rani Mukerji: इंडियन फिल्म फेस्टिव्हल ऑफ मेलबर्नमध्ये राणी मुखर्जीचा सन्मान; अभिनयातील उत्कृष्टतेसाठी विशेष गौरव