बुधवार, 26 ऑगस्ट 2026
( फोटो सौजन्य- सोशल मिडिया)
Mrityu Chakra Movie: मराठी सिनेसृष्टीतील लोकप्रिय आणि बहुआयामी अभिनेता पुष्कराज चिरपुटकर आता आगामी मराठी चित्रपट ‘मृत्यूचक्र’मधून प्रेक्षकांच्या भेटीला येणार आहे. आपल्या सहजसुंदर अभिनयाने आणि विविधांगी भूमिकांमधून प्रेक्षकांच्या मनात स्थान निर्माण करणाऱ्या पुष्कराजची या चित्रपटातील व्यक्तिरेखा सध्या चर्चेचा विषय ठरत आहे.
श्रीमहादेव फिल्म प्रोडक्शन प्रस्तुत आणि अध्यांश मोशन पिक्चर प्रोडक्शन्स निर्मित ‘मृत्यूचक्र’ या चित्रपटाची निर्मिती प्रणाली उन्मेश वाघमोडे यांनी केली आहे. चित्रपटाचे दिग्दर्शन विलास वाघमोडे आणि अनुप्रिता कडु-गंगावणे यांनी केले आहे.
‘मृत्यूचक्र’ हा रहस्य आणि थराराने भरलेला चित्रपट आहे. चित्रपटातील प्रत्येक व्यक्तिरेखा कथानकाला वेगळी दिशा देणारी असल्याचे सांगितले जात आहे. अशाच रहस्यमय वातावरणात पुष्कराज चिरपुटकर ‘गुरु’ या व्यक्तिरेखेत दिसणार आहे.
मात्र, ‘गुरु’ नेमका कोण आहे? कथानकात त्याची भूमिका काय आहे? त्याचा इतर व्यक्तिरेखांशी नेमका काय संबंध आहे? या प्रश्नांची उत्तरे सध्या निर्मात्यांनी गुलदस्त्यात ठेवली आहेत. त्यामुळे पुष्कराजच्या या व्यक्तिरेखेबद्दल प्रेक्षकांची उत्सुकता वाढली आहे.
पुष्कराज चिरपुटकरने आजवर विनोदी तसेच गंभीर अशा विविध प्रकारच्या भूमिका साकारल्या आहेत. त्याच्या अभिनयातील सहजता आणि व्यक्तिरेखेत शिरण्याची पद्धत प्रेक्षकांना नेहमीच भावली आहे. त्यामुळे ‘मृत्यूचक्र’मध्ये तो नेमक्या कोणत्या अंदाजात दिसणार, याकडे चाहत्यांचे लक्ष लागले आहे.
चित्रपटाच्या शीर्षकापासून ते व्यक्तिरेखांपर्यंत अनेक गोष्टी रहस्याच्या आवरणात ठेवण्यात आल्या आहेत. ‘गुरु’च्या व्यक्तिरेखेची पहिली झलक समोर आल्यानंतर या व्यक्तिरेखेभोवतीचे गूढ आणखी वाढले आहे.
‘मृत्यूचक्र’मध्ये पुष्कराज चिरपुटकरचा ‘गुरु’ नेमका कोण आहे आणि कथानकात त्याची भूमिका किती महत्त्वाची आहे, याचे उत्तर चित्रपट प्रदर्शित झाल्यानंतरच मिळणार आहे. त्यामुळे रहस्य आणि थराराने भरलेल्या या चित्रपटाबद्दल प्रेक्षकांमध्ये उत्सुकता निर्माण झाली आहे.
