उष्णतेचा प्रकोप! निवडणूक ड्युटीवर असणाऱ्या 18 कर्मचाऱ्यांचा मृत्यू

Heat Wave Lok Sabha Election : दिवसेंदिवस उष्णतेचा कहर वाढतच चालला आहे. देशभरात उष्माघातामुळे आतापर्यंत 54 जणांचा मृत्यू झाला आहे. तर बिहारमध्ये उष्णतेमुळे निवडणूक ड्युटीवर असणाऱ्या 18 कर्मचाऱ्यांचा मृत्यू झाल्याचे समोर आले आहे.

लोकसभा निवडणुकीच्या आज शेवटच्या टप्प्यातील 57 जागांसाठी आज मतदान होत आहे. याचदरम्यान उत्तर प्रदेश आणि बिहारमध्ये मतदानासाठी ड्युटीवर असलेल्या 18 कर्मचाऱ्यांचा उष्माघातामुळे मृत्यू झाल्याची बातमी समोर येत आहे. देशभरात उष्णतेमुळे आतापर्यंत ४३ जणांचा मृत्यू झाला आहे. बिहारमध्ये उष्णतेमुळे 32 जणांना जीव गमवावा लागला आहे. त्याचवेळी ओडिशातही उष्णतेमुळे १० जणांना जीव गमवावा लागला आहे.

उष्णतेमुळे 18 कर्मचाऱ्यांचा मृत्यू

भारतात सध्या उष्णता भयंकर वाढली आहे. देशात अनेक ठिकाणी तापमान ४५ अंश सेल्सिअसवर पोहोचले आहे. दिल्लीत 52 अंश सेल्सिअस तापमानाची नोंद झाली आहे. दरम्यान, उत्तर प्रदेश आणि बिहारमध्ये निवडणूक ड्युटीसाठी तैनात असलेल्या 18 मतदान कर्मचाऱ्यांचा उष्माघातामुळे मृत्यू झाला आहे. तर बिहारमध्ये उष्णतेमुळे 10 मतदान कामगारांचा मृत्यू झाला. दरम्यान, उत्तर प्रदेशातील मिर्झापूर जिल्ह्यात 8 जणांचा मृत्यू झाला आहे.

मिर्झापूर जिल्हा प्रशासनाने दिलेल्या माहितीनुसार, निवडणुकीच्या शेवटच्या टप्प्यासाठी मतदान केंद्रावर तैनात असलेल्या तीन कर्मचाऱ्यांची प्रकृती शुक्रवारी अचानक बिघडली. त्यानंतर त्यांना रुग्णालयात दाखल करण्यात आले. मात्र, उपचार सुरू असतानाच त्यांचा मृत्यू झाला. शवविच्छेदन अहवाल आल्यानंतर मृत्यूचे कारण स्पष्ट होईल, असे प्रशासनाने सांगितले. मात्र, परिसरात प्रचंड उकाडा असल्याने त्यांची प्रकृती बिघडली असावी, असा संशय व्यक्त केला जात आहे. यानंतर उत्तर प्रदेशात आणखी पाच जणांचा मृत्यू झाला.

बिहारमध्ये उष्णतेच्या लाटेमुळे 32 जणांचा मृत्यू झाला. तर औरंगाबादमध्ये 17, आराहमध्ये 6, गया आणि रोहतासमध्ये प्रत्येकी तीन, बक्सरमध्ये दोन आणि पाटण्यात एकाचा मृत्यू झाला. ओडिशातील राउरकेला येथे 10 जणांचा मृत्यू झाला. याशिवाय झारखंडच्या पलामू जिल्ह्यात गेल्या २४ तासांत ५ जणांचा मृत्यू झाला आहे. त्याच वेळी, ओडिशामध्ये 10 जणांचा, राजस्थानमध्ये 5 जणांचा आणि उत्तर प्रदेशमध्ये 1 जणांचा मृत्यू झाला आहे.

दरम्यान, रायबरेली आणि सोनभद्र येथील ईव्हीएम स्ट्राँग रूमच्या सुरक्षेसाठी तैनात असलेल्या अधिकाऱ्याचा मृत्यू झाल्याची प्राथमिक माहिती मिळत आहे. तसेच बिहारमध्ये गेल्या 24 तासांत उष्णतेच्या लाटेमुळे मृत्यू झालेल्या 14 लोकांपैकी 10 मतदान कर्मचारी होते. बिहारमधील राज्य आपत्ती व्यवस्थापन विभागाने सांगितले की, अति उष्णतेमुळे एकूण 14 जणांचा मृत्यू झाला आहे. यामध्ये 10 निवडणूक कर्मचारी आणि अन्य चार जणांचा समावेश आहे. यामध्ये भोजपूर जिल्ह्यातील पाच निवडणूक कर्मचारी, रोहतास जिल्ह्यातील तीन निवडणूक कर्मचारी, कैमूर जिल्ह्यातील एक निवडणूक कर्मचारी आणि औरंगाबाद जिल्ह्यातील एक निवडणूक कर्मचारी आणि अन्य चार कर्मचाऱ्यांचा समावेश आहे.