‘रेमंड’चे संस्थापक विजयपत सिंघानिया यांचे निधन; वयाच्या 87 वर्षी घेतला अखेरचा श्वास

विजयपत सिंघानिया यांनी १९८० ते २००० या काळात रेमंड ग्रुपचे अध्यक्ष आणि व्यवस्थापकीय संचालक म्हणून काम केले.

नवी दिल्ली : रेमंडचे संस्थापक विजयपत सिंघानिया यांचे शनिवारी रात्री उशिरा मुंबईत निधन झाले. वयाच्या ८७ वर्षी त्यांनी अखेरचा श्वास घेतला. त्यांचे पुत्र आणि रेमंडचे सध्याचे अध्यक्ष गौतम सिंघानिया यांनी त्यांच्या निधनाची माहिती दिली. ‘एक्स’ या सोशल मीडिया प्लॅटफॉर्मवर लिहिले, ‘अत्यंत दुःखाने आणि जड अंतःकरणाने, आम्ही पद्मभूषण डॉ. विजयपत कैलाशपत सिंघानिया यांच्या निधनाची माहिती देत आहोत’.

विजयपत सिंघानिया यांचे मुंबईत निधन झाले असून, त्यांच्यावर रविवारी चंदनवाडी स्मशानभूमीत अंत्यसंस्कार करण्यात येतील. कुटुंबीय आणि मित्र परिवाराने रविवारी दुपारी १:३० वाजता हवेली, एल. डी. रुपारेल मार्ग येथे जमावे, असे आवाहन करण्यात आले आहे. विजयपत सिंघानिया यांनी १९८० ते २००० या काळात रेमंड ग्रुपचे अध्यक्ष आणि व्यवस्थापकीय संचालक म्हणून काम केले. त्यांच्या नेतृत्वाखाली, रेमंडने केवळ सूट आणि कपड्यांपुरते मर्यादित न राहता, सिंथेटिक फॅब्रिक्स, डेनिम, स्टील, औद्योगिक फाईल्स आणि सिमेंट यांसारख्या क्षेत्रांमध्ये विस्तार केला.

हेदेखील वाचा : Credit Card द्वारेही भरता येतो Income Tax? काय आहे संपूर्ण प्रक्रिया, जाणून घ्या सविस्तर

सिंघानिया यांनी रेमंडला भारतातील सर्वात प्रतिष्ठित जीवनशैली आणि फॅब्रिक ब्रँडपैकी एक म्हणून स्थापित केले. १९९४ मध्ये, त्यांना भारतीय हवाई दलातर्फे ‘मानद एअर कमोडोर’ या पदवीने सन्मानित करण्यात आले. विमानचालन क्षेत्रातील योगदानाबद्दल त्यांना ‘तेनझिंग नोर्गे राष्ट्रीय साहसी पुरस्कारा’नेही सन्मानित करण्यात आले. नोव्हेंबर २००५ मध्ये, वयाच्या ६७ व्या वर्षी, त्यांनी सुमारे ६९००० फूट उंचीवर हॉट एअर बलून उडवून एक ऐतिहासिक कामगिरी केली.

सिंघानिया यांच्या मागे हजारो कोटींची संपत्ती

माध्यमांच्या वृत्तानुसार, विजयपत सिंघानिया यांनी अंदाजे १२००० कोटी रुपयांची संपत्ती मागे ठेवली आहे. २०१५ मध्ये, त्यांनी आपल्या कंपनीतील ३७% हिस्सा आपल्या मुलाकडे सुपूर्द केला. त्यांचे पुत्र, गौतम सिंघानिया, आता रेमंड ग्रुपचे प्रमुख आहेत.