नागपूर (Nagpur). कोरोनातून बरे झाल्यानंतर होणाऱ्या म्युकरमायकोसिस (mucormycosis) या आजारामुळे नागपुरातील एकाला तब्बल दीड कोटी रुपये (Rs 1.5 crore) उपचारासाठी (treatment) खर्च आला. मात्र इतका खर्च करूनही त्यांना एक डोळा आणि जबडा (eye and a jaw) गमवावा लागला. वेळेत निदान झाले नाही तर काय होऊ शकते याचे हे उदाहरण आहे.
नवीन पॉल (वय ४६) असे या रुग्णाचे नाव आहे. नवीन नागपूरला जीएसटीमध्ये कार्यरत आहेत, तर पत्नी संगीता या दक्षिण पूर्व मध्य रेल्वेत आहेत. करोनाच्या पहिल्या लाटेत नवीन यांना १६ सप्टेंबर रोजी करोना संसर्ग झाला. त्यांना श्वास घ्यायला त्रास होत असल्याने एका खासगी रुग्णालयात दाखल करण्यात आले. २२ दिवस उपचार करण्यात आले.
तिथे असतानाच त्यांचा एका डोळ्याखाली लाल रेघ आली होती व जबडा दुखत होता. तेथील डॉक्टारांनी डोळ्याच्या डॉक्टरांना बोलावले. मात्र त्यांनी काही विशेष नसल्याचे सांगितले. तरीही त्रास होता. त्यामुळे आठ लाख रुपये बिल भरून तेथून सुटी घेतली.
घरी आल्यावर नवीन भ्रमिष्टासारखे करायला लागले. मेंदूवर काही परिणाम झाला असेल म्हणून त्यांना धंतोलीतील एका खासगी रुग्णालयात नेण्यात आले. या रुग्णालयात १० ऑक्टोबर ते १० नोव्हेंबर असे एक महिना ते होते. या काळात त्यांचा एक डोळा मोठा होऊन बाहेर आला होता. मात्र तिथेही म्युकरचे निदान झाले नाही. तेथे १६ लाख रुपये भरल्यानंतर हैदराबाद येथे डोळ्यांच्या प्रसिद्ध दवाखान्यात नेण्यात आले. मात्र तिथेही हा त्रास म्युकरमुळे असल्याचे सांगता आले नाही.
शेवटी नागपूरला पुन्हा दुसऱ्या खासगी रुग्णालयात त्यांना दाखल केले. तिथे यांच्या डोळ्यात कसला तरी संसर्ग झाला आहे व उपचारासाठी मुंबईला हिंदुजा हॉस्पिटलला नेण्याचा सल्ला देण्यात आला. हिंदुजामध्ये डॉक्टरांनी पाहिल्याबरोबर म्युकर असल्याचे सांगितले. तिथे नाकावाटे काळी बुरशी काढण्यात येत होती. मात्र डोळ्याचा त्रास तसाच होता.
तेथे रोज ७० हजार रुपयांचे इंजेक्शन व आठवड्याला ४२ हजार रुपयांच्या कॅप्सुल लागायच्या. २० नोव्हेंबर ते १२ डिसेंबर ते तिथे होते. १६ लाख रुपये बिल झाले. त्यामुळे तेथून सुटी घेतली. त्यावेळी तेथील एका डॉक्टरांनी नागपूरला डॉ. अश्विनी तायडे यांचा संदर्भ दिला. त्यानुसार नागपूरच्या मेडिट्रेना रुग्णालयात दाखल करण्याचे ठरले. दरम्यान, रेल्वे कर्मचाऱ्यांचे नेते पितांबर अण्णा यांनी रुग्णालयात दाखल करण्यासंबंधीची सर्व औपचारिकता पूर्ण करून ठेवली. त्यानंतर मुंब‌ईवरून नवीन यांना थेट मेडिट्रेनामध्ये नेण्यात आले. डॉ. मिलिंद चांगोले यांनी दुसऱ्याच दिवशी त्यांचा एक डोळा काढला. त्यांचा वरचा जबडाही काढण्यात आला. कारण या शस्त्रक्रिया केल्या तरच त्यांचा जीव वाचू शकला असता. डॉ. तायडे यांच्यासह डॉ. चांगोले, डॉ. डहाने, डॉ. अग्रवाल आमच्यासाठी देव असल्याची भावना संगीता यांनी व्यक्त केली.
रेल्वेने दिले एक कोटी
संगीता रेल्वेत नोकरी करीत असल्याने रेल्वेने मोठे अर्थसाह्य केले. नवीन यांच्यावरील उपचारासाठी आजवर १ कोटी ४८ लाख रुपये खर्च आला. त्यापैकी तब्बल १ कोटी रुपये रेल्वेने दिले.
कुटुंबाची साथ
या कठीण प्रसंगात माझे भाऊ, बहीण, दीर, भाचे सर्वच आमच्या पाठीशी उभे झाले. मी माझे दागिने गहान ठेवले. पीएफमधील रक्कम काढली. जवळ जे होते ते सर्व उपचारासाठी लावले. नवीन यांच्या अधिकाऱ्यांनी ५ लाख रुपये दिले. या सर्वांचे खूप उपकार आहेत, अशी भावना संगीता यांनी व्यक्त केली.
