कोरेगाव येथील जरंडेश्वर सहकारी साखर कारखाना शासनाने अवसायनात काढला; सहकार क्षेत्रात खळबळ

कोरेगाव तालुक्यातील जरंडेश्र्वर सहकारी साखर कारखाना अवसायनात निघाला असून, साखर कारखान्याच्या अवसायक पदी कोरेगाव तालुक्याच्या दुय्यम सहकारी उपनिबंधक प्रिती कि. काळे यांची शासनाने नियुक्ती केली आहे.

कोरेगाव : कोरेगाव तालुक्यातील जरंडेश्र्वर सहकारी साखर कारखाना अवसायनात निघाला असून, साखर कारखान्याच्या अवसायक पदी कोरेगाव तालुक्याच्या दुय्यम सहकारी उपनिबंधक प्रिती कि. काळे यांची शासनाने नियुक्ती केली आहे. याबाबत अधिक माहिती अशी की महाराष्ट्र राज्य सहकारी बँकेने ,इतर अनेक बँकांच्या कोट्यवधी रुपयांच्या थकीत कर्जाच्या वसुलीसाठी लिलावात काढला. गुरु कमोडिटी प्रा. लि. या खाजगी कंपनीने लिलावात तो साखर कारखाना ६५ कोटी ७५ लाख रुपयांना २०१० साली विकत घेतला.

साखर कारखान्याच्या तत्कालीन चेअरमन माजी महसूलमंत्री डॉ. शालिनीताई पाटील यांनी लगेचच सन. २०११ सालापासून विविध कोर्टात जरंडेश्र्वर सहकारी साखर कारखाना विक्री विरोधात अनेक दावे दाखल करुन राज्य सरकारच्या आणि राज्य सहकारी बँकेच्या विरोधात आवाज उठवला जरंडेश्र्वर सहकारी साखर कारखाना विक्री व्यवहार रद्द व्हावा आणि साखर कारखाना पुन्हा शेतकरी सभासदांच्या मालकीचा करावा यासाठी गेली दहा वर्षे शालिनीताई पाटील यांचा विविध कोर्टात न्यायालयीन संघर्ष सुरू होता. असे असताना जरंडेश्र्वर सहकारी साखर कारखान्यावर अचानक अवसायक नेमून शासनाने शालिनीताई पाटील यांना मोठा धक्का दिला.

राज्याचे साखर सहसंचालक यांनी जरंडेश्र्वर सहकारी साखर कारखाना शासकीय आदेशानुसार अवसायनात काढला असून, साखरकारखान्याच्या अवसायकपदी कोरेगावच्या उपनिबंधक प्रिती कि. काळे यांची नियुक्ती शासनाने नकतीच केली आहे. यामुळे सहकार क्षेत्रात खळबळ उडाली आहे.