अक्षय बर्दापूरकरांचा ‘महाराष्ट्र सन्मान’ पुरस्काराने गौरव!

राज भवन येथे पार पडलेल्या या सोहळ्यात आमदार मंगल प्रभात लोढा, नमो सिने, टीव्ही निर्माता असोसिएशनचे अध्यक्ष संदीप घुगे यांची उपस्थिती होती.

नमो सिने, टीव्ही निर्माता असोसिएशनच्या वतीनं आयोजित करण्यात आलेला ‘मेड इन इंडिया आयकॉन’ सोहळा नुकताच संपन्न झाला. मराठीतील पहिलेवहिलं ओटीटी प्रेक्षकांच्या भेटीला आणून, मराठमोळी संस्कृती सातासमुद्रापार पोहोचवणारे ‘प्लॅनेट मराठी’चे प्रमुख, संस्थापक अक्षय बर्दापूरकर यांना या सोहळ्यात ‘महाराष्ट्र सन्मान’ या मानाच्या पुरस्कारानं गौरवण्यात आलं. महाराष्ट्र, गोव्याचे राज्यपाल भगतसिंग कोश्यारी यांच्या हस्ते हा पुरस्कार अक्षय यांना प्रदान करण्यात आला.

राज भवन येथे पार पडलेल्या या सोहळ्यात आमदार मंगल प्रभात लोढा, नमो सिने, टीव्ही निर्माता असोसिएशनचे अध्यक्ष संदीप घुगे यांची उपस्थिती होती. निर्माता, कलाकार, दिग्दर्शक आणि सिनेसृष्टी संबंधीत इतर विभाग तसेच टेलिव्हिजन, डिजिटल इंडस्ट्रीत अमूल्य योगदान देणाऱ्या मान्यवरांना नमो सिने, टीव्ही निर्माता असोसिएशनच्या वतीनं आयोजित करण्यात येणाऱ्या ‘मेड इन इंडिया आयकॉन’ सोहळ्यात गौरवण्यात येतं.

यंदा या पुरस्कार सोहळ्याचं दुसरे वर्ष आहे. या पुरस्काराविषयी अक्षय म्हणाले की, माझ्या कामाची दखल घेऊन, या पुरस्कारानं गौरवल्याबद्दल नमो सिने, टीव्ही निर्माता असोसिएशनचे आभार. त्यांच्या अशा उपक्रमांमुळं सिनेसृष्टी संबंधित प्रत्येकालाच प्रोत्साहन मिळतं. असे पुरस्कार नक्कीच ऊर्जा वाढवणारे असतात, सोबतच कामाविषयीची आपली जबाबदारीही वाढवतात. जगभरातील मराठमोळ्या प्रेक्षकांना उत्कृष्ट, आशयपूर्ण कंटेन्ट देण्यासोबतच त्यांना मनोरंजनात्मक कार्यक्रम देण्यासाठी ‘प्लॅनेट मराठी’ बांधील आहे.