आजपासून निवासी डॉक्टर संपावर; लाठीहल्ल्याचा निषेध आणि पदव्युत्तर प्रवेशाची प्रक्रिया तातडीने सुरू करावी या मागणीसाठी संप

पदव्युत्तर प्रवेश प्रक्रियेच्या मुद्यावरून दिल्लीत आंदोलन करणाऱ्या निवासी डॉक्टरांवर पोलिसांनी केलेल्या लाठीहल्ल्याचा निषेध आणि पदव्युत्तर प्रवेशाची प्रक्रिया तातडीने सुरू करावी या मागणीसाठी आज ३१ डिसेंबर रोजी सकाळी ११पासून संपावर जाण्याचा निर्णय मार्डने घेतला आहे.

नागपूर (Nagpur) : पदव्युत्तर प्रवेश प्रक्रियेच्या मुद्यावरून दिल्लीत आंदोलन करणाऱ्या निवासी डॉक्टरांवर पोलिसांनी केलेल्या लाठीहल्ल्याचा निषेध आणि पदव्युत्तर प्रवेशाची प्रक्रिया तातडीने सुरू करावी या मागणीसाठी आज ३१ डिसेंबर रोजी सकाळी ११पासून संपावर जाण्याचा निर्णय मार्डने घेतला आहे. सर्व शासकीय वैद्यकीय महाविद्यालय रुग्णालयांमधील कोव्हिड वॉर्ड व आकस्मिक विभाग वगळता अन्य सेवा बंद करण्याचा निर्णय निवासी डॉक्टरांनी घेतला आहे.

[read_also content=”नागपूर/ ‘थर्टी फर्स्ट’वर निर्बंधांचा अंकुश; नियम मोडल्यास कडक कारवाईचा पोलीस प्रशासनाचा इशारा https://www.navarashtra.com/latest-news/restrictions-on-thirty-first-police-administration-warns-of-stern-action-if-rules-are-broken-nrat-216998.html”]

वैद्यकीय शाखेतील पदव्युत्तर प्रवेशासाठी घेण्यात येणाऱ्या परीक्षेची संपूर्ण प्रक्रिया अजूनही पूर्ण झालेली नाही. त्याचा परिणाम शासकीय रुग्णालयांमधील आरोग्यसेवांवर होत आहे. त्यामुळे ही प्रक्रिया लवकरात लवकर पूर्ण करावी, अशी या डॉक्टरांची मागणी आहे. त्यासाठीच दिल्लीत आंदोलन सुरू आहे. एमबीबीएसनंतर एमडी किंवा एमएस या पदव्युत्तर अभ्यासक्रमाला प्रवेश घेण्यासाठी प्रवेशप्रक्रिया द्यावी लागते. वास्तविक ही परीक्षा २०२१च्या जानेवारीतच व्हायला हवी होती. मात्र, त्यावेळी ती न घेता मेमध्ये होईल, असे जाहीर करण्यात आले. मेमध्ये कोव्हिडची दुसरी लाट असल्याने ती पुढे ढकलून १२ ऑगस्ट रोजी घेण्यात आली. परीक्षेनंतर पात्र विद्यार्थ्यांचे अखिल भारतीय स्तरावर समुपदेशन होत असते. हा प्रवेशप्रक्रियेचाच भाग असतो.

मात्र, आरक्षणविषयक याचिकांमुळे सर्वोच्च न्यायालयाने या प्रवेशप्रक्रियेवर अनिश्चित काळासाठी स्थगिती दिली आहे. या प्रवेश प्रक्रियेचे अजून समुपदेशन तर सुरू केलेच नाही, उलट दिल्लीत आंदोलन करणाऱ्या डॉक्टरांवर लाठीहल्ला करण्यात आला. त्यांना फरफटत नेण्यात आले, असा संताप सेंट्रल मार्डचे अध्यक्ष डॉ. अविनाश दहीफळे यांनी व्यक्त केला. सेंट्रल मार्डच्या निर्णयानुसार नागपुरातही हे आंदोलन करण्यात येणार असल्याचे मेयोमधील मार्डचे अध्यक्ष डॉ. अर्पित धकाते यांनी ‘मटा’शी बोलताना सांगितले.