उदयसिंह पाटील मित्र होते तर पालकमंत्री सन्माननीय; डॉ. अतुल भोसले यांचे सूचक विधान

जिल्हा बँक ही शिखर बँक आहे. याठिकाणी योग्य लोक निवडून जावेत, अशी आमची भूमिका आहे. त्यासाठी या निवडणुकीसंदर्भात भारतीय जनता पक्षाच्या पदाधिकारी, कार्यकर्त्यांसह पक्ष विचारांच्या लोकांची बैठक घेण्यात येईल.

कराड : जिल्हा बँक ही शिखर बँक आहे. याठिकाणी योग्य लोक निवडून जावेत, अशी आमची भूमिका आहे. त्यासाठी या निवडणुकीसंदर्भात भारतीय जनता पक्षाच्या पदाधिकारी, कार्यकर्त्यांसह पक्ष विचारांच्या लोकांची बैठक घेण्यात येईल. पालकमंत्री सन्माननीय आहेत, तर उदयदादा जवळचे मित्र होते, असे सांगत डॉ. भोसले यांनी आपली भूमिका गुलदस्त्यात ठेवली.

तसेच योग्यवेळी याबाबतचा निर्णय जाहीर करणार असल्याचे सांगत जिल्हा बँकेच्या कराड सोसायटी मतदारसंघातून आमची भूमिका निर्णायक असल्याचा दावाही भाजप प्रदेश कार्यकारिणी सदस्य डॉ. अतुल भोसले यांनी पत्रकार परिषदेत केला. यावेळी शहराध्यक्ष एकनाथ बागडी, जिल्हाध्यक्ष विक्रम पावसकर, भाजप नेते शेखर चारेगावकर, नगराध्यक्षा रोहिणी शिंदे यांच्यासह पदाधिकारी उपस्थित होते.

डॉ. अतुल भोसले म्हणाले, सातारा जिल्हा मध्यवर्ती बँक की शिखर बँक आहे. जिल्ह्यातील साखर कारखानदारीला मोठ्या प्रमाणात या बँकेकडून अर्थसहाय्य दिले जाते. त्यामुळे सातारा जिल्हा बँक निवडणुकीत सोयीची भूमिका घेण्याऐवजी योग्य भूमिका घेणे आवश्यक आहे.

पालकमंत्री बाळासाहेब पाटील गटाशी आमची पूर्वी आमचे चांगले संबंध होते. त्यांचे बंधू माझे चांगले मित्र आहेत. तर ऍड. उदयसिंह पाटील यांच्या गटाशी आमच्या गटाची यापूर्वी सलगी होती. परंतु, ती आता काही कारणांनी राहिली नाही. त्यामुळे जिल्हा बँक निवडणुकीत एक मतदार या नात्याने आम्ही आमची भूमिका घेणार असून, ती योग्य वेळी जाहीर करू, असे त्यांनी स्पष्ट केले.

डॉ. अतुल भोसले यांची भूमिका ठरणार निर्णायक

जिल्हा बँकेला आम्ही ज्याला मदत करू; तो उमेदवार नक्कीच निवडून येवू शकतो, असा दावा डॉक्टर अतुल भोसले यांनी व्यक्त केला. त्यामुळे जिल्हा बँकेच्या कराड सोसायटी मतदारसंघात डॉ.भोसले यांची निर्णायक भूमिका राहणार असल्याचे यावरून स्पष्ट होत आहे.