फोटो सौजन्य - Social Media
उन्हाळा आला की सर्वात आधी ज्या फळाची आठवण होते, तो म्हणजे आंबा. चविष्ट, गोडसर आणि मनाला मोहून टाकणारा हा फळांचा राजा खाण्यास जितका मस्त, तितकाच तो आरोग्यासाठीही उपयुक्त आहे. पण तुम्हाला माहिती आहे का, जगभरात आंब्याच्या सुमारे 1000 पेक्षा जास्त जाति आहेत? आंबा केवळ चवीनंच नाही, तर पोषणमूल्यांनीही भरलेला असतो. ‘वेबएमडी’ या आरोग्यविषयक संकेतस्थळानुसार, आंब्यामध्ये जीवनसत्त्व A, C, K, पोटॅशियम, बीटा-कॅरोटीन, फोलेट, मॅग्नेशियम, कॅल्शियम, लोह, सेलेनियम, फॉस्फरस आणि मँगनीज भरपूर प्रमाणात असतात. हे सगळे घटक शरीराचं संरक्षण करत असतात आणि रोगप्रतिकारक शक्ती वाढवतात. त्यामुळे तुम्ही वारंवार आजारी पडण्यापासून वाचता.
आंबा खाल्ल्यानं पचनक्रिया सुधारते, हे अनेक संशोधनातून स्पष्ट झालं आहे. यामध्ये भरपूर प्रमाणात आहारातील तंतू असतात, जे आपल्या पचनसंस्थेला सक्रिय ठेवतात. हे तंतू अन्न सहजपणे पचवण्यास मदत करतात आणि मलावरोध, गॅस, अपचन, आम्लपित्त अशा त्रासांपासून दिलासा देतात. जेव्हा पचन व्यवस्थित होतं, तेव्हा पोट हलकं वाटतं आणि दिवसभर उत्साहही टिकून राहतो. विशेषतः ज्या लोकांना सतत बद्धकोष्ठतेचा त्रास होतो, त्यांच्यासाठी आंबा फायदेशीर ठरतो.
फक्त एवढंच नाही तर आंबा आपल्या त्वचेसाठीही एक नैसर्गिक टॉनिकसारखं काम करतो. त्यात असलेली जीवनसत्त्वं A आणि C त्वचेचं पोषण करतात, कोरडेपणा दूर करतात आणि त्वचेला टवटवीत ठेवतात. यामुळे चेहऱ्यावर नैसर्गिक चमक येते आणि सुरकुत्या लांब राहतात. विटामिन A त्वचेच्या नव्या पेशी निर्माण करण्यात महत्त्वाची भूमिका बजावतं, तर विटामिन C शरीरातील कोलाजेनचं उत्पादन वाढवतं, जे त्वचेला घट्ट आणि तरुण ठेवण्यास मदत करतं.
म्हणूनच असं म्हणायला हरकत नाही की, आंबा हा केवळ फळांचा राजा नाही, तर आपल्या आरोग्यासाठी एक नैसर्गिक डॉक्टरसुद्धा आहे. त्याची चव तर मोहक असतेच, पण त्याचे फायदेही तितकेच अमूल्य आहेत. त्यामुळे उन्हाळ्यात आंब्याचा जरूर आस्वाद घ्या – पण त्याचा अतिरेक टाळा, कारण कोणतीही गोष्ट अती प्रमाणात घेतल्यास तिचे दुष्परिणाम होऊ शकतात.
.png "Videos"){kind=small}
