फोटो सौजन्य - Social Media
वीकेंड ट्रिप म्हणजे दोन दिवसांची छोटी सुट्टी, पण मनाला आणि शरीराला नवा उत्साह देणारा अनुभव.
मात्र या छोट्या प्रवासाची तयारीच अनेकदा मोठं डोकं दुखीचं कारण बनते. कधी काही महत्त्वाचं विसरतो, तर कधी गरज नसलेल्या गोष्टी भरतो. म्हणूनच जर तुम्हाला तुमचा वीकेंड ट्रिप पूर्णपणे रिलॅक्स आणि टेन्शन-फ्री करायचा असेल, तर या ५ आवश्यक वस्तू नक्कीच सोबत ठेवा.
१. पोर्टेबल पॉवर बँक
आजकाल आपला सगळा प्रवास मोबाईलवर अवलंबून असतो — नकाशा पाहणे, फोटो काढणे, टॅक्सी बुक करणे, सर्व काही फोनवर. अशा वेळी मोबाईलची बॅटरी संपणे म्हणजे मोठं संकट. त्यामुळे एक चांगला पॉवर बँक नेहमी बॅगमध्ये ठेवा. यामुळे फोन कायम चार्ज राहील आणि प्रवासात कोणतीही अडचण येणार नाही.
२. फर्स्ट-एड किट
प्रवास लहान असो वा मोठा, फर्स्ट-एड किट नेहमी सोबत असणं गरजेचं आहे. यात डोकेदुखी, पोटदुखी, तापासाठीच्या काही सामान्य गोळ्या, बँडेज, अँटीसेप्टिक क्रीम आणि सॅनिटायझर ठेवा. अचानक लागलेली किरकोळ जखम किंवा तब्येत बिघडल्यास हे खूप उपयोगी ठरते.
३. रीयूजेबल वॉटर बॉटल आणि स्नॅक्स
प्रवासादरम्यान पाणी आणि खाण्याच्या वस्तू नेहमी महाग मिळतात किंवा सहज उपलब्ध नसतात. त्यामुळे स्वतःची वॉटर बॉटल आणि काही हलके-फुलके स्नॅक्स बिस्किट, एनर्जी बार, फळे सोबत ठेवा. यामुळे खर्च वाचेल आणि तुम्ही प्रवासभर हायड्रेटेड आणि एनर्जेटिक राहाल.
४. ट्रॅव्हल ऑर्गनायझर
बॅग भरल्यानंतरही वस्तू शोधण्यात वेळ जातो, हे सर्वांना ठाऊक आहे. त्यामुळे ट्रॅव्हल ऑर्गनायझर किंवा लहान पाउचमध्ये चार्जर, हेडफोन, पेन ड्राइव्ह अशा छोट्या वस्तू व्यवस्थित ठेवा. यामुळे वेळही वाचेल आणि वस्तू सापडण्यात त्रास होणार नाही.
५. हलका जॅकेट किंवा शाल
हवामान कसंही असो, रात्री किंवा डोंगराळ भागात थोडी गारवा जाणवू शकतो. एसी बस किंवा ट्रेनमध्येही थंडी वाटू शकते. त्यामुळे एक हलका जॅकेट किंवा शाल नेहमी सोबत ठेवा. हे तुम्हाला हवामानातील अचानक बदलांपासून संरक्षण देईल आणि प्रवास अधिक आरामदायी बनेल.
थोडक्यात, वीकेंड ट्रिपचा खरा आनंद घ्यायचा असेल तर या काही छोट्या पण उपयुक्त वस्तू बॅगमध्ये ठेवा. मग प्रवास कितीही लहान असो, अनुभव नेहमी लक्षात राहील.
.png "Videos"){kind=small}
