कोकणी पद्धतीची पारंपरिक कुळीथ पिठी, वाचा सोपी रेसिपी

कोकणात बनवली जाणारी पारंपरिक कुळीथ पिठी कशी बनवायची याची जाणून घ्या सोपी रेसिपी.

कोकणामध्ये अजूनही पारंपरिक पदार्थ जेवणासाठी बनवले जातात. त्यातील एक पदार्थ म्हणजे कुळीथ पिठी. वर्षाच्या बाराही महिने कोकणात हा पदार्थ बनवला जातो. चपाती, भात किंवा भाकरीसोबत ही पिठी खायला अगदी सुंदर लागते. पावसाळ्याच्या दिवसांमध्ये घरात गरमागरम पिठी बनवली जाते. कोकणातील प्रत्येक व्यक्तीला कुळिथाची पिठी आवडते. गरम गरम पिठी भात आणि पापड हे बेत सगळ्यांचाच आवडीचा आहे. कुळीथ पीठामध्ये अनेक गुणकारी आणि पौष्टिक घटक असतात. जे आरोग्यासाठी फायदेशीर आहे. आज आम्ही तुम्हाला कोकणात बनवली जाणारी पारंपरिक कुळीथ पिठी कशी बनवायची याची सोपी रेसिपी सांगणार आहोत. ही रेसिपी घरी नक्की बनवून पाहा.(फोटो सौजन्य: instagram)

साहित्य:

• कुळीथ पीठ
• मिरची
• मीठ
• हळद
• मोहरी
• कोकम
• कांदा
• लसूण
• ओल खोबर
• कोथिंबीर

कृती:

• कुळीथ पिठी बनवण्यासाठी एका भांड्यात कुळीथाचे पीठ घेऊन त्यात आवश्यकतेनुसार पाणी घालून व्यवस्थित मिक्स करा. यामध्ये गुठळ्या ठेवू नये.
• त्यानंतर गॅसवर टोप गरम करायला ठेवून त्यात तेल टाका. तेल गरम झाल्यानंतर फोडणीसाठी मोहरी टाकून व्यवस्थित भाजून घ्या.
• नंतर त्यात लसूण आणि कांदा टाका. कांद्यामध्ये मीठ टाकून मंद आचेवर कांदा गुलाबी होईपर्यंत भाजून घ्या.
• कांदा भाजून झाल्यानंतर त्यात हळद टाकून व्यवस्थित चमच्याने परतून घ्या. नंतर त्यात कुळीथाच्या पिठीचे मिश्रण ओता.
• गॅस मंद आचेवर ठेवून पिठी व्यवस्थित शिजवून घ्या. त्यामध्ये कोकम टाकून मिक्स करा.
• पिठी शिजल्यानंतर त्यात आवडीनुसार ओल खोबर टाकून गॅस बंद करून घ्या. वरून कोथिंबीर टाका.
• तयार आहे कोकणातील पारंपरिक खमंग कुळीथ पिठी.