शनिवार, 17 ऑक्टोबर 2026
पुणे : चंपाषष्ठीनिमित्त कांदापात, मेथीला मागणी वाढली आहे. मेथीची आवक कमी झाल्याने दरात मोठी वाढ झाली आहे. किरकोळ बाजारात कांदापातीच्या एका जुडीला ३० रुपये दर मिळाले. मेथीच्या एका जुडीला ३० ते ३५ रुपये दर मिळाले.
चंपाषष्ठीनिमित्त नैवेद्यासाठी कांदापात, मेथी, वांग्यांना मागणी वाढते. पुणे जिल्ह्यातील बारामती दौंड तालुक्यातून मार्केट यार्डातील तरकारी विभागात कांदापातीच्या २० हजार जुडींची आवक झाली. मेथीच्या २५ हजार जुडींची आवक झाली. नाशिक, जालना, पुणे जिल्ह्यातील शेतकऱ्यांनी मेथी विक्रीस पाठविली. मेथीची आवक गेल्या आठवड्याच्या तुलनेत कमी झाल्याने दरवाढ झाली. कांदापात, मेथीच्या मागणीत वाढ झाली असून, मागणीच्या तुलनेत आवक कमी झाल्याची माहिती श्री छत्रपती शिवाजी मार्केट यार्डातील पालेभाजी व्यापारी राजेंद्र सूर्यवंशी यांनी दिली.
घाऊक बाजारात मेथीच्या शेकडा जुडीला १५०० ते २५०० रुपये असे दर मिळाले. कांदापातीच्या शेकडा जुडींना ८०० ते १६०० रुपये दर मिळाले. कांदापात, मेथीसह वांग्यांना मागणी वाढली आहे. किरकोळ बाजारात पावशेर वांग्यांची विक्री ४० ते ५० रुपये दराने केली जात आहे. घाऊक बाजारात दहा किलो वांग्यांना ४०० ते ५०० रुपये दर मिळाले आहेत. गेल्या आठवड्याच्या तुलनेत पालेभाज्यांची आवक कमी झाल्याने कोथिंबीर, मेथी, शेपू, चाकवत, करडई, मुळा, पुदिना, चवळईच्या दरात वाढ झाली.
