‘कायदा फक्त आमच्यासाठीच आहे का?’; थाप्याचे केअरटेकर गोविंद येवले यांचा प्रशासनाला थेट सवाल

दसरा उत्सवातील केदारनाथ आणि भैरवनाथ या देवतांची पारंपरिक बंधुभेट यंदाही होऊ शकली नाही. दांडेघर ग्रामस्थांनी पोलीस बंदोबस्तात आपली पालखी लवकर काढून माघारी नेल्याने ही परंपरा खंडित झाली.

• पसरणीचा ऐतिहासिक दसरा उत्सव उत्साहात
• तक्रारी अर्जांवरूनच एवढी मोठी कारवाई कशी?
• ग्रामस्थांच्या भावना यांचा विचार न करता थापा सील

पाचगणी : संपूर्ण महाराष्ट्रात प्रसिद्ध असलेला पसरणीचा ऐतिहासिक दसरा उत्सव यंदाही हजारो भाविकांच्या उपस्थितीत पारंपरिक उत्साहात आणि निर्विघ्नपणे पार पडला. मात्र, उत्सवापूर्वी प्रशासनाने थापा सील केल्याने निर्माण झालेल्या परिस्थितीने महाबळेश्वरच्या तहसीलदारांच्या कारभारावरच गंभीर प्रश्नचिन्ह उभे केले आहे. हजारो भाविकांची श्रद्धा, शेकडो वर्षांची परंपरा आणि ग्रामस्थांच्या भावना यांचा विचार न करता थापा सील करण्याची कारवाई नेमकी कोणत्या आधारावर करण्यात आली, असा संतप्त सवाल आता उपस्थित होत आहे.

विशेष म्हणजे, ज्या ठिकाणी संभाव्य वादाचे कारण पुढे करून निर्बंध लादण्यात आले, त्याच ठिकाणी हजारो ग्रामस्थांच्या उपस्थितीत कोणताही मोठा अनुचित प्रकार घडला नाही. मग प्रशासनाच्या कारवाईमागील नेमके कारण काय, असा प्रश्न उपस्थित होत आहे. थापा सील झाल्याने यंदाचा दसरा उत्सव कसा पार पडणार, याकडे संपूर्ण वाई तालुक्याचे लक्ष लागले होते. मात्र, पसरणीकरांची एकजूट, भाविकांची श्रद्धा आणि परंपरा जपण्याची भूमिका लक्षात घेऊन वाईच्या प्रांताधिकाऱ्यांनी सकारात्मक भूमिका घेतली. त्यांनी महाबळेश्वरच्या तहसीलदारांना थापा खुला करण्याबाबत निर्देश दिल्यानंतर उत्सवाचा मार्ग मोकळा झाला.

Vasai Virar Water Cut Crisis : वसई-विरारवर 10% पाणीकपातीचे सावट! 8 दिवसांत अहवाल सादर करण्याचे महापौरांचे निर्देश

थाप्याचे मालक वाकडे यांनीही परंपरा अखंडित ठेवण्यासाठी दांडेघर आणि पसरणी ग्रामस्थांना सहकार्य केले. त्यामुळे यंदाचा दसरा उत्सव पार पडला; परंतु प्रशासनाच्या कारवाईने निर्माण केलेले प्रश्न अद्याप अनुत्तरित आहेत.

बंधुभेटीची परंपरा खंडित; पसरणीच्या तरुणांचा संताप

दसरा उत्सवातील केदारनाथ आणि भैरवनाथ या देवतांची पारंपरिक बंधुभेट यंदाही होऊ शकली नाही. दांडेघर ग्रामस्थांनी पोलीस बंदोबस्तात आपली पालखी लवकर काढून माघारी नेल्याने ही परंपरा खंडित झाली. त्यामुळे पसरणीतील तरुणांमध्ये नाराजी पसरली. संतप्त तरुणांनी काही काळ रस्त्यावर ठिय्या दिल्याने प्रशासनाला त्यांची समजूत काढावी लागली. मात्र, पोलीस प्रशासनाने परिस्थिती अत्यंत संयमाने आणि शांततेने हाताळल्याने कोणताही मोठा वाद निर्माण झाला नाही. एका बाजूला शेकडो वर्षांची धार्मिक परंपरा, तर दुसऱ्या बाजूला प्रशासनाच्या कारवाईतून निर्माण झालेली मर्यादा, अशा कात्रीत यंदा भाविक सापडले. उत्सव पार पडला, मात्र बंधुभेट न झाल्याची खंत पसरणीकरांच्या मनात कायम राहिली.

तक्रारी अर्जांवरूनच एवढी मोठी कारवाई कशी?

थाप्याचे केअरटेकर गोविंद येवले यांनी प्रशासनाच्या भूमिकेवर तीव्र आक्षेप घेतले. ते म्हणाले, “महाबळेश्वरच्या तहसीलदारांनी भविष्यात येथे वाद होऊ शकतात, असे कारण पुढे करून हा पॉईंट सील केला. गेले सहा महिने माझी व माझ्या कामगारांची उपासमार सुरु आहे. पोलिसांकडे करण्यात आलेल्या तक्रारी अर्जांच्या आधारेच एवढी मोठी कारवाई करण्यात आली. मात्र, संभाव्य वादाची शक्यता आणि प्रत्यक्षात घडलेली घटना यांत फरक असतो. हजारो ग्रामस्थ उपस्थित असताना दसऱ्याच्या दिवशी कोणताही मोठा अनुचित प्रकार घडला नाही. मग थापा सील करण्याची वेळ का आली, याचे उत्तर प्रशासनाने द्यायला हवे.”