ज्ञानेश्वर माऊलींच्या पालखीत सिलेंडरने घेतला पेट; अग्निशमन दलाच्या जवानांमुळे टळली दुर्घटना

संत ज्ञानेश्वर माऊलींची पालखी सध्या मार्गस्थ होत आहे. यावेळी एक दिंडीमध्ये गॅस सिलेंडरला आग लागली. यावेळी पुणे अग्निशमन दलाने तातडीने ही आग विजवण्यामुळे मोठा अनर्थ टळला.

पुणे : राज्यामध्ये सध्या आषाढी वारी सुरु आहे. संत ज्ञानेश्वर महाराजांची पालखी सासवडमध्ये आली आहे. आज सकाळच्या सुमारास सासवड – जेजुरी रस्ता, वाळुंज फाटा या ठिकाणी श्री संत ज्ञानेश्वर महाराज पालखी मार्गस्थ होत होती. पालखीतील दिंडी क्रमांक 78 मधील वारकऱ्यांचा स्वयंपाक सुरु होता. यावेळी अचानक घरगुती सिलेंडरने पेट घेतल्याची घटना घडली होती. तिथे असलेल्या वारकऱ्यांनी वाळू मारत आग विझवण्याचा प्रयत्न केला व त्याचवेळी पालखीमध्ये बंदोबस्तावर तैनात असलेल्या अग्निशमन वाहनास संपर्क साधण्यात आला.

पुणे अग्निशमन दलाने धाव घेतल्याने मोठा अनर्थ टाळला

पुणे अग्निशमन दलाचे वाहन गेली कित्येक वर्ष आळंदी ते पंढरपुर माऊलींच्या सुरक्षतेकरिता तसेच आग व आपत्कालिन परिस्थितीत तातडीने मदत मिळावी म्हणून अग्निशमन अधिकारी व जवानांसह तैनात असते. इतर महानगरपालिका, पीएमआरडीए व नगरपालिका व इतर अग्निशमन वाहनेदेखील बंदोबस्ताकरता असतात. आज घडलेल्या घटनेमुळे पुणे अग्निशमन दलाच्या जवानांनी वेळीच आग आटोक्यात आणल्याने उपस्थित वारकरी समुदाय यांनी जवानांचे आभार मानले. पुणे अग्निशमन दलाचे प्रमुख देवेंद्र पोटफोडे यांनी ही अधिकारी व जवानांचे कौतुक केले. अग्निशमन वाहन तातडीने घटनास्थळी पोहोचत जवानांनी पेटलेला सिलेंडरवर पाण्याचा मारा करत आग आटोक्यात आणल्याने मोठा अनर्थ टळला.

वारीतील दिंडीमद्ये घडलेल्या या प्रकारामुळे कोणतीही हानी झालेली नाही. अग्निशमन दलाने तातडीने घटनास्थळी धाव घेत सिलेंडरवर पाण्याचा मारा केला. जवानांनी आग आटोक्यात आणली. यामध्ये जीवितहानी झालेली नाही. या कामगिरीत अग्निशमन अधिकारी प्रमोद सोनावणे, वाहनचालक नारायण जगताप, तांडेल विलास दडस, फायरमन श्री बाबासाहेब चव्हाण, चंद्रकांत नवले व अटेंडंड युवराज गवारी यांनी कामगिरी बजावली.