विधानसभेआधी हर्षवर्धन पाटलांना मोठा धक्का; जवळच्या व्यक्तीने अपक्ष उमेदवाराला पाठिंबा दिल्याने गणितं बदलणार?

इंदापूर:  इंदापूर विधानसभा मतदारसंघात राष्ट्रवादी शरदचंद्र पवार पक्षाचे उमेदवार हर्षवर्धन पाटील यांना मोठा धक्का बसला आहे. हर्षवर्धन पाटील यांचे चुलत बंधू मयूर पाटील यांनी त्यांची साथ सोडत अपक्ष उमेदवार प्रवीण माने यांना पाठिंबा दिला आहे. मंगळवारी (दि.५) सोनाई पॅलेस येथे पत्रकार परिषदेत त्यांनी  परिवर्तन पॅनलचे अपक्ष उमेदवार प्रवीण माने यांना पाठिंबा देत असल्याचे जाहीर केले. यावेळी त्यांनी हर्षवर्धन पाटील यांच्यावर जोरदार टीकास्त्र सोडले.

इंदापूर कृषी उत्पन्न बाजार समीतीचे माजी सभापती मयूर पाटील म्हणाले की, इतर उमेदवारांच्या तुलनेत प्रवीण माने यांना जनतेचा जास्त पाठिंबा आहे. आताचे उमेदवार मलिन प्रतिमेचे आहेत आणि लोकांना आता बदल हवा आहे. जनता आता आजी-माजी उमेदवार नको असं म्हणत आहे. जे विचार घेऊन मी काम करत होतो त्यांना तिलांजली देण्याचे काम आमच्या घरातल्या लोकांनी केले. त्यामुळे तालुक्याची विल्हेवाट लागायला लागली आहे. सहकारी संस्था हुकूमशाही पद्धतीने चालवण्यात आल्या. आम्ही काम करत होतो तेव्हा वरुन आदेश आल्याशिवाय काही होत नव्हतं. त्यांनी मंत्रि‍पदाचा, आमदाराकीचा उपयोग तालुक्याच्या विकासासाठी करणं आवश्यक होतं. पण तसं चित्र दिसलं नाही, अशी टीका मयूर पाटील यांनी केली.

मयूर पाटील यांनी साथ सोडल्यानंतर हर्षवर्धन पाटील यांना मोठा धक्का बसला आहे. हर्षवर्धन पाटील यांना उमेदवारी जाहीर झाल्यापासून इंदापूरातील राजकारण सातत्याने बदलत आहे. हर्षवर्धन पाटील यांना उमेदवारी मिळाल्यानंतर प्रवीण माने, भरत शहा आणि आप्पासाहेब जगदाळे यांनी शरद पवार गटाची साथ सोडली होती. त्यानंतर आता मयूर पाटील यांनी हर्षवर्धन पाटील यांची साथ सोडत परिवर्तन विकास आघाडीच्या प्रवीण माने यांना पाठिंबा दिला आहे. दुसरीकडे आप्पासाहेब जगदाळे हे अजित पवार यांच्या राष्ट्रवादी काँग्रेसमध्ये प्रवेश करणार आहेत. दरम्यान, इंदापूरची विधानसभा निवडणूक हर्षवर्धन पाटील आणि दत्तात्रय भरणे यांच्यात होईल असं सुरुवातीपासून वाटत होतं. परंतू,प्रवीण माने यांनी अपक्ष उमेदवारी दाखल करत सर्वांना धक्का दिला आहे.

हेही वाचा: Indapur Election: इंदापूरमध्ये टफ फाईट होणार; ‘या’ नेत्याच्या उमेदवारीचा नेमका कोणाला होणार फायदा?

राज्यात विधानसभा निवडणुकीचे बिगुल वाजले आहे. दिवाळी संपताच प्रचार सभांना सुरुवात झाली आहे. काल उमेदवारी अर्ज मागे घेण्याचा शेवटचा दिवस होता. अनेक ठिकाणी बंडखोरी रोखण्यात महायुती आणि महाविकास आघाडील यश आले आहे. विधानसभा निवडणुकीसाठी २० तारखेला मतदान होणार आहे. तर मतमोजणी २३ तारखेला होणार आहे. शिवसेना आणि राष्ट्रवादी कॉँग्रेसमध्ये फुट पडल्यानंतर ही पहिल्यांदाच विधानसभा निवडणूक होत आहे. इंदापूरची जागा भाजपला जाणार नाही आणि त्यामुळ आपल्याला उमेदवारी मिळण्याची शक्यता नसल्याचे हर्षवर्धन पाटील यांच्या लक्षात आले. त्यानंतर त्यांनी शरद पवार यांच्या राष्ट्रवादी कॉँग्रेस पक्षात प्रवेश केला. त्यानंतर त्यांना महाविकास आघाडीकडून इंदापूरची उमेदवारी मिळाली आहे. आधी दुहेरी असणारी लढत आता तिरंगी होणार आहे.

Web Title: Indapur harshwardhan brother mayur patil support to indepedent candidate pravin mane

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News  only on Navarashtra.com