शनिवार, 24 ऑक्टोबर 2026
Top Marathi News Today Live : नेपाळमध्ये जलप्रलय; हजारो लोक गेले वाहून
Marathi Breaking News Updates : तिबेट सीमेजवळील नेपाळच्या रसुवा जिल्ह्यात बुधवारी सकाळी भोटेकोशी नदीला अचानक आलेल्या महापुरामुळे मोठी हानी झाली. या महापुराच्या तडाख्यात अनेक गावे आणि विविध प्रकल्पस्थळे वाहून गेल्याचे वृत्त असून, सुमारे १००० जण वाहून गेल्याची प्राथमिक माहिती समोर आली आहे. मात्र, या आकडेवारीला अद्याप अधिकृत दुजोरा मिळालेला नाही. या जलप्रलयात १३३ भारतीय पर्यटक बेपत्ता झाल्याचे वृत्त आहे.
स्थानिक वेळेनुसार, बुधवारी सकाळी सुमारे ९ वाजण्याच्या सुमारास नदीच्या पाणीपातळीत अचानक मोठी वाढ झाली. भोटेकोशी नदीचा उगम तिबेटच्या भागात होत असल्याने तिबेटच्या दिशेने आलेल्या पाण्याच्या लोंढ्‌यामुळे ही परिस्थिती निर्माण झाल्याचे नेपाळ पोलिसांनी सांगितले. नदीकाठच्या रहिवाशांना तातडीने सुरक्षित आणि उंच ठिकाणी स्थलांतर करण्याचे आवाहन प्रशासनाने केले. मात्र, तोपर्यंत अनेक गावे पाण्याच्या अजस्त्र लोंढ्यात वाहून गेली. अद्याप १०० हुन अधिक मृतदेह हाती लागले असून बेपत्ता नागरिकांचा शोध घेण्यासाठी बचाव पथके कार्यरत आहेत.
27 Aug 2026 10:59 AM (IST)
सोन्याच्या दरात पुन्हा एकदा वाढ झाली आहे. आज, २७ ऑगस्ट रोजी, MCX वर सोन्याचा भाव ६३७ रुपयांनी वाढून १,६०,३०० रुपयांवर पोहोचला. चांदीचा भावही १,६६८ रुपयांनी वाढून २,४१,३०६ रुपये प्रति किलोग्रामवर पोहोचला. आंतरराष्ट्रीय बाजारातही या दोन्ही मौल्यवान धातूंच्या दरात वाढ होत आहे. सोन्याचा भाव ०.७१ टक्क्यांनी वाढून ४,६८६ डॉलर प्रति औंस झाला, तर चांदीचा भाव १.६७ टक्क्यांनी वाढून ६९ डॉलर प्रति औंस झाला.
27 Aug 2026 10:50 AM (IST)
जर तुम्हीही खरेदी, ऑनलाइन पेमेंट किंवा इतर गरजांसाठी क्रेडिट कार्डचा वापर करत असाल, तर भारतीय रिझर्व्ह बँकेचे हे आकडे तुम्हाला थक्क करू शकतात. देशभरात क्रेडिट कार्डद्वारे होणारा खर्च सतत वाढत आहे. जुलै २०२६ मध्ये क्रेडिट कार्डच्या माध्यमातून झालेला एकूण खर्च सुमारे २.०८ लाख कोटी रुपये होता, जो गेल्या वर्षीच्या जुलै महिन्याच्या तुलनेत जास्त आहे.
27 Aug 2026 10:40 AM (IST)
छत्रपती संभाजीनगर मध्ये खळबळजनक प्रकार घडला आहे. दोन नातेवाईकांच्या जुन्यावादातुन हा प्रकार घडल्याचे समोर आले असुन या घटनेने परिसरात चिंताजनक वातावरण निर्माण झाले आहे.
मिळालेला माहीतीनुसार, छत्रपती संभाजीनगरच्या नारळीबाग परीसरातील राहणाऱ्या लोखंडे कुटुंबासोबत हा प्रकार घडला. या भागात राहणाऱ्या लोखंडे कुटुंबीयाकडे दोन श्वानांची पिल्ली होती. पण अज्ञात व्यक्तीने जुन्या वादातुन दोन श्वानांच्या पिल्लांची हत्या केली.
27 Aug 2026 10:30 AM (IST)
पृथ्वीवरील सजीव सृष्टीचा समतोल राखण्यासाठी निसर्गाने दिलेली सर्वात मोठी आणि सुंदर भेट म्हणजे तलाव. दरवर्षी २७ ऑगस्ट रोजी जगभरात ‘जागतिक तलाव दिन’ (World Lake Day) साजरा केला जातो. हा दिवस केवळ तलावांच्या नैसर्गिक सौंदर्याचे कौतुक करण्याचा नसून, मानवी जीवनातील त्यांचे स्थान, जैवविविधतेतील योगदान आणि त्यांच्या संवर्धनाची तातडीची गरज अधोरेखित करण्यासाठी अत्यंत महत्त्वपूर्ण मानला जातो. तलाव हे केवळ पाण्याचे मोठे साठे नसून ते संपूर्ण परिसंस्थेचा (Ecosystem) कणा आहेत. पिण्याचे शुद्ध पाणी, शेतीसाठी सिंचन, मत्स्य व्यवसाय आणि मानवी उपजीविकेची साधने या सर्वांसाठी तलाव अत्यंत उपयुक्त ठरतात.
27 Aug 2026 10:20 AM (IST)
नीती आयोगाच्या नव्या अहवालाने देशातील उच्च शिक्षण आणि रोजगार बाजारपेठेतील मोठी दरी चव्हाट्यावर आणली आहे. अहवालानुसार, देशातील सर्व पदवीधरांमध्ये बेरोजगारीचा दर १३ टक्के असून, महिला पदवीधरांमध्ये हा आकडा २०.४ टक्के आहे, जो राष्ट्रीय सरासरीच्या (३.२%) तुलनेत खूप जास्त आहे.
27 Aug 2026 10:10 AM (IST)
चार महिने दर्यापासून दूर राहिलेल्या कोळी बांधवांना आता पुन्हा समुद्राची ओढ लागली आहे. नारळी पौर्णिमेच्या निमित्ताने कल्याणच्या भोईवाडा कोळीवाड्यात सणाची लगबग सुरू झाली असून, आज २७ ऑगस्टला पारंपरिक पद्धतीने नारळी पौर्णिमेचा उत्सव साजरा केला जाणार आहे. मिरवणूक काढत कोळी बांधव खाडीकिनारी समुद्रपूजेसाठी जाणार आहेत.
27 Aug 2026 09:55 AM (IST)
चंद्रपूर : राज्यात एकीकडे प्रवेश परीक्षा, स्पर्धा परीक्षांच्या पेपरफुटीचा मुद्दा गाजत असताना दुसरीकडे चंद्रपुरात बोगस गुणपत्रिकेची घटना समोर आली आहे. विविध विद्यापीठांच्या बनावट गुणपत्रिका आणि पदवी रॅकेटचा चंद्रपुरात पर्दाफाश करण्यात आला असून असू एका आरोपीस पोलिसांनी अटक केली आहे. या बोगस गुणपत्रिका प्रकरणातील मुख्य सूत्रधार फरार असून पोलिस त्याचा शोध घेत आहेत.
27 Aug 2026 09:47 AM (IST)
चाकण-भोसरीच्या औद्योगिक पट्ट्याला नवी ऊर्जा देणा-या ४९ सूक्ष्म, लघु व मध्यम उद्योगांसोबतच्या (एमएसएमई) सामंजस्य कराराच्या माध्यमातून २ हजार ३२०.९७ कोटी रुपयांची गुंतवणूक प्रस्तावित आहे. या गुंतवणुकीतून उत्पादनक्षमता वाढण्यासोबतच हजारो रोजगारांच्या नव्या संधी निर्माण होतील आणि ग्रोथ इंजिन असणाऱ्या पुणे परिसरातील औद्योगिक परिसंस्थेलाआणखी बळ मिळेल, असा विश्वास मुख्यमंत्री देवेंद्र फडणवीस यांनी व्यक्त केला.
27 Aug 2026 09:30 AM (IST)
मुंबईतील आमदारांच्या विधिमंडळातील कामगिरीबाबत महत्त्वाची आकडेवारी समोर आली आहे. प्रजा फाउंडेशनने प्रसिद्ध केलेल्या ‘मुंबईज एमएलए रिपोर्ट कार्ड २०२६’ (Mumbai MLA Report Card 2026) मध्ये मुंबईतील ३३ आमदारांच्या कामगिरीचे मूल्यमापन करण्यात आले आहे. हिवाळी अधिवेशन २०२४ ते पावसाळी अधिवेशन २०२५ या कालावधीत आमदारांनी विचारलेले प्रश्न, प्रश्नांची गुणवत्ता, विधिमंडळातील सहभाग, उपस्थिती आणि इतर निकषांच्या आधारे हे मूल्यांकन करण्यात आले आहे.
27 Aug 2026 09:20 AM (IST)
नेपाळमध्ये बालेन शाह यांचे सरकार सत्तेत आणण्यासाठी ज्यांनी पुढाकार घेतला तीच जेन-झी पिढी आता सरकारविरोधात रस्त्यावर उतरली आहे. नव्या सरकारला अद्याप १५० दिवसही पूर्ण झालेले नसताना बालेन शाह यांना जनतेचा रोष, संसदेचा दबाव आणि पक्षातील नाराजीचा सामना करावा लागत आहे. बालेन शाह पंतप्रधान झाल्यानंतर अवघ्या दोन महिन्यांतच युवा आंदोलकांनी त्यांच्या राजीनाम्याची मागणी करत काठमांडूतील मैतीघर मंडला येथे पुन्हा आंदोलन केले.
27 Aug 2026 09:10 AM (IST)
सायबर गुन्हेगारांकडून पोलीस, सीबीआय किंवा न्यायाधीशांच्या नावाने नागरिकांना भीती दाखवून, घाबरवून फसवणूक केली जाते. त्यामुळे नागरिकांनी अशा कोणत्याही प्रकारांना बळी न पडता सायबर फसवणूक झाल्यास तातडीने ‘१९३०’ या सायबर हेल्पलाईन क्रमांकावर संपर्क साधावा, असे आवाहन मुख्यमंत्री देवेंद्र फडणवीस यांनी केले. सह्याद्री अतिथीगृह येथे महाराष्ट्र सायबरच्या वतीने आयोजित कार्यक्रमात मुख्यमंत्री देवेंद्र फडणवीस यांच्या हस्ते ‘डिजिटल अरेस्ट’ या सायबर जनजागृती लघुपटाचे आणि ‘१९३० महाराष्ट्र सायबर अँथम’चे लोकार्पण करण्यात आले. यावेळी ते बोलत होते.
27 Aug 2026 09:00 AM (IST)
पुण्यश्लोक अहिल्यादेवी होळकर शेतकरी कर्जमुक्ती योजने अंतर्गत धाराशिव जिल्ह्यातील २१ हजार ७९३ लाभार्थी शेतकऱ्यांच्या कर्जखात्यावर तब्बल १८३ कोटी ८५ लाख ८९ हजार ९५६ रुपयांची कर्जमाफीची रक्कम जमा करण्यात आली आहे. राज्यातील आधार प्रमाणीकरण पूर्ण झालेल्या ६ लाख ३६ हजार ३६ पात्र शेतकऱ्यांच्या कर्जखात्यावर २४ ऑगस्ट रोजी एकूण ५ हजार ८६ कोटी ३० लाख रुपये ऑनलाइन पद्धतीने जमा करण्यात आले.
