WhatsApp आले कामी; केवळ अर्ध्या तासात 'त्या' बालिकेला सुखरुप केले पालकांच्या स्वाधीन
मंगळवेढा : लहान मुले हरवल्यानंतर परत मिळणे अनेकदा अवघड होते. मात्र, मंगळवेढा शहरात एक सकारात्मक बाब समोर आली. दामाजी चौकात एक अडीच वर्षीय बालिका फिरताना मिळून आल्याने तिच्या पालकांना पोलिसांनी केवळ व्हॉटसऍपच्या माध्यमातून अर्ध्या तासात शोध घेऊन कुटुबियांच्या ताब्यात दिले.
दामाजी चौकातील श्री संत दामाजी पुतळ्याजवळ आशिया नामक अडीच वर्षीय मुलगी मंगळवारी (दि.4) सायंकाळी सातच्या सुमारास सैरावैरा फिरत असल्याचे नंदा गायकवाड व शुभांगी गायकवाड या दोघींच्या निदर्शनास आले. या दोघी पंढरपूरहून बसमधून उतरुन मंगळवेढा शहरात जात असताना या दोघींची नजर त्या बालिकेकडे गेली. तिला मायेने जवळ घेऊन वडिलाचे नाव, आईचे नाव विचारले असता ती केवळ एकच शब्द बोलत असल्याने आई, वडिलाविषयी माहिती मिळू शकली नाही. तेव्हा तिला मंगळवेढा पोलीस ठाण्यात आणले.
हेदेखील वाचा : Solapur News: 24 हजार रूग्णांना ‘आयुष्यमान भारत योजने’चा लाभ; तब्बल 55 कोटींचा निधी वितरित
सहाय्यक पोलीस निरीक्षक विनोद लातुकर, पोलीस उपनिरीक्षक नागेश बनकर, गोपनीय विभागाचे दिगंबर गेजगे, ठाणे अंमलदार कृष्णा जाधव, महिला पोलीस हवालदार वंदना अहिरे आदींनी सदर मुलीचे फोटो काढून शहरातील सर्व व्हॉटसऍप ग्रुपवर टाकल्यानंतर त्या मुलीच्या पालकांचा शोध लागला. सदरची मुलगी आई, वडिलांबरोबर एका कार्यक्रमस्थळी आली होती. आई, वडिल कार्यक्रमात असताना नजर चुकवून ती मुलगी रस्त्यावर आली व रोडने ती फिरत फिरत दामाजी चौकापर्यंत येऊन पोहचली.
दरम्यान, या मुलीच्या वडिलाने पोलीस ठाण्यात येऊन मुलीची ओळख सांगितल्यानंतर पोलीसांनी त्या बालिकेला त्यांच्या ताब्यात दिल्यानंतर आई-वडिलाचा जीव भांड्यात पडला. सदर मुलीच्या वडिलाचे नाव अक्रम अब्बास मुलाणी (रा.मुलाणी गल्ली) असल्याचे सांगण्यात आले.
