शुक्रवार, 16 ऑक्टोबर 2026
आता क्रिकेटच्या मैदानाबाहेर FDAची ‘धडाकेबाज बॅटिंग’! MCAच्या फूड आउटलेट्सवर मुंढेंची कारवाई
FDAच्या अधिकाऱ्यांनी 20 ऑगस्ट 2026 रोजी MCAच्या BKC परिसरातील खाद्यपदार्थांच्या आउटलेट्सची तपासणी केली होती. या तपासणीत अन्नसुरक्षा, स्वच्छता तसेच खाद्य व्यवसायासाठी आवश्यक परवान्यांशी संबंधित अनेक त्रुटी निदर्शनास आल्याचे सांगण्यात आले. या तपासणीनंतर दुसऱ्याच दिवशी म्हणजे 21 ऑगस्ट 2026 रोजी संबंधित फूड लायसन्स आणि रजिस्ट्रेशन निलंबित करण्याचे आदेश जारी करण्यात आले. तसेच FDAने परमिट रूम, पॅव्हिलियन, मेडिटेरेनियन, ओरिएंटल स्विंग आणि क्लब अँड पेस्ट्री काउंटर या पाच आउटलेट्सवर कारवाई केली आहे.
तपासणीमध्ये समोर आलेला महत्त्वाचा मुद्दा म्हणजे खाद्य व्यवसायाच्या परवान्याचा प्रत्यक्ष वापर. MCAला अन्न सुरक्षा आणि मानके कायदा, 2006 अंतर्गत चार रेस्टॉरंट्ससाठी स्वतंत्र चार फूड लायसन्स देण्यात आले होते. याशिवाय एका स्नॅक काउंटरसाठी रजिस्ट्रेशन सर्टिफिकेट जारी करण्यात आले होते. मात्र, FDAच्या तपासणीत संबंधित आउटलेट्सवरील खाद्य व्यवसायाचे प्रत्यक्ष संचालन दुसऱ्या कंपनीकडून केले जात असल्याचे आढळून आले. या कंपनीच्या नावावर संबंधित खाद्य व्यवसायासाठी आवश्यक परवाना नसल्याचेही तपासणीत निदर्शनास आले. त्यामुळे परवान्याच्या अटींचे उल्लंघन झाल्याचे स्पष्ट झाल्यानंतर MCAच्या नावावर असलेले चार फूड लायसन्स आणि एक रजिस्ट्रेशन सर्टिफिकेट तत्काळ प्रभावाने निलंबित करण्यात आले.
FDAची कारवाई केवळ परवान्यांमधील अनियमिततेपुरती मर्यादित राहिलेली नाही. तपासणीदरम्यान आउटलेट्समध्ये अन्नपदार्थ हाताळण्याची पद्धत, परिसरातील स्वच्छता आणि अन्नसुरक्षेशी संबंधित विविध बाबींमध्येही त्रुटी आढळल्याचे सांगण्यात आले. FDAच्या माहितीनुसार, अन्न सुरक्षा आणि मानके विनियम, 2011 मधील अनुसूची 4, भाग 2 अंतर्गत निर्धारित करण्यात आलेल्या विविध अन्नसुरक्षा आणि स्वच्छताविषयक निकषांचे पालन होत नसल्याचे तपासणीमध्ये समोर आले.
मुंबईसह महाराष्ट्रात हॉटेल्स, रेस्टॉरंट्स, खाद्यपदार्थांची दुकाने आणि इतर खाद्य व्यवसाय करणाऱ्या आस्थापनांमध्ये नियमांचे पालन केले जाते की नाही, यावर FDAकडून लक्ष केंद्रित केले जात आहे. विशेषतः ग्राहकांच्या आरोग्याशी थेट संबंध असलेल्या अन्नपदार्थांच्या बाबतीत स्वच्छता आणि सुरक्षिततेशी तडजोड करणाऱ्यांविरोधात कारवाई केली जात आहे. FDA आयुक्त तुकाराम मुंढे यांच्या नेतृत्वाखाली सुरू असलेल्या या मोहिमेमुळे नियमांकडे दुर्लक्ष करणाऱ्या व्यावसायिकांचे धाबे दणाणले आहेत. MCAसारख्या प्रसिद्ध संस्थेच्या परिसरातील आउटलेट्सवर झालेल्या कारवाईमुळे FDAची तपासणी केवळ लहान व्यावसायिकांपुरती मर्यादित नसल्याचा संदेशही गेला आहे.
खाद्य व्यवसायाचा परवाना ज्या व्यक्ती किंवा संस्थेच्या नावावर जारी करण्यात आला आहे, त्याच परवान्याच्या अटींनुसार व्यवसाय चालवणे आवश्यक आहे. त्याचबरोबर अन्न तयार करणे, साठवणूक, हाताळणी आणि ग्राहकांना अन्न देताना निर्धारित स्वच्छता व अन्नसुरक्षेच्या निकषांचे पालन करणे बंधनकारक आहे. MCAच्या परिसरातील पाच आउटलेट्सवरील कारवाईतून FDAने ‘परवाना आणि अन्नसुरक्षेच्या नियमांचे उल्लंघन खपवून घेतले जाणार नाही’ असा स्पष्ट संदेश खाद्य व्यवसाय क्षेत्राला दिला आहे.
