मंगळवार, 20 ऑक्टोबर 2026
नागपूर – धीरेंद्र महाराजांनी नागपुरात आयोजित केलेल्या दिव्य दरबारात केलेल्या वक्तव्यांविरोधात अखिल भारतीय अंधश्रद्धा निर्मूलन समितीचे प्रमुख श्याम मानव यांनी गुन्हा दाखल करण्याची मागणी केली. मात्र, नागपूर पोलिसांनी धीरेंद्र महाराजांविरोधात जादुटोणा कायदा आणि ड्रग अँड रेमेडीज कायद्यानुसार कोणताही गुन्हा दाखल होऊ शकत नाही, असं स्पष्ट केलं आहे. नागपूरचे पोलीस आयुक्त अमितेश कुमार यांनी आज पत्रकार परिषदेत याबाबत माहिती दिली.
पोलिसांवर दबाव असल्याचा काहीच प्रश्न नाही
पोलीस आयुक्त अमितेश कुमार म्हणाले, “आम्ही धीरेंद्र महाराजांचा व्हिडीओ बारकाईने पाहिला आहे. त्यात कोणताही चुकीचा प्रकार आढळला नाही. त्यामुळे त्यांच्यावर गुन्हा दाखल होऊ शकत नाही. पोलिसांवर दबाव असल्याचा काहीच प्रश्न नाही. आमच्या या निर्णयाविरोधात न्यायालयात जाण्याचा मार्ग श्याम मानव यांच्याकडे आहे. त्यावर मी काहीही प्रतिक्रिया देणार नाही.” “दिव्य दरबाराचे ७,८ तारखेचे ६ तासांचे व्हिडीओ होते. त्यामुळे याच्या निष्कर्षापर्यंत यायला वेळ लागला. मात्र, या व्हिडीओत कोणताही गुन्हा घडलेला नाही,” असंही अमितेश कुमार यांनी सांगितलं.
