आता कास पठारावर हिंडा रात्रभर; ‘नाईट सफारी’ होणार सुरु

जगभरातील पर्यटकांना भुरळ घातलेल्या जागतिक वारसास्थळ कास पठारावर पावसाळ्यानंतर विविध रंगीबेरंगी फुलांचे गालिचे तयार होतात. ही हंगाम फुले पाहण्यासाठी जगभरातून लाखो पर्यटक याठीकाणी भेट देतात. हे पर्यटन हंगामापुरते मर्यादित न राहता, ते पठार व परिसरात फिरायला यावेत व त्यातून स्थानिकांना रोजगार निर्मिती व्हावी, या हेतूने नाईट जंगल सफारी सुरू करण्यात येणार आहे.

सातारा : जगभरातील पर्यटकांना भुरळ घातलेल्या जागतिक वारसास्थळ कास पठारावर पावसाळ्यानंतर विविध रंगीबेरंगी फुलांचे गालिचे तयार होतात. ही हंगाम फुले पाहण्यासाठी जगभरातून लाखो पर्यटक याठीकाणी भेट देतात. हे पर्यटन हंगामापुरते मर्यादित न राहता, ते पठार व परिसरात फिरायला यावेत व त्यातून स्थानिकांना रोजगार निर्मिती व्हावी, या हेतूने नाईट जंगल सफारी सुरू करण्यात येणार आहे. सातारा उपवनसंरक्षक महादेव मोहिते यांच्या संकल्पनेतून सातारा वनविभाग व कास पठार कार्यकारी समिती यांच्या समन्वयातून हा उपक्रम राबविला जाणार आहे.

कास पठार व परिसरातील पर्यटन हे हंगामी न राहता, ते बारमाही रहावे आणि पर्यटन वाढीस लागावे, या हेतूने मंगळवारपासून (दि.१९) नाईट जंगल सफारीचा हा अनोखा उपक्रम राबवण्यात येणार आहे. ताडोबा अभयारण्याच्या धर्तीवर कास पठार व परिसरातील ५० किमी अंतरावर नाईट जंगल सफारी करण्याचे कास पठार कार्यकारी समिती व सातारा वनविभाग यांनी निश्चित केले आहे.

या नव्याने सुरू केलेल्या उपक्रमासाठी समितीकडून दोन सुसज्ज गाड्या तयार करण्यात आल्या आहेत. याचा मार्ग कास पुष्प पठार – घाटाई फाटा – घाटाई देवी मंदिर – वांजुळवाडी – कास तलाव – कास मंदिराच्या पुढील बाजूने तांबी फाटा -पाली, तांबी – धावली – जुंगटी – कात्रेवाडी – परत तांबी फाटा – अंधारी – कोळघर – सह्याद्रीनगर – चिकनवाडी – मोळेश्वर – एकीव – पारंबे फाटा परत कास पुष्प पठार असा ५० किमीचा हा मार्ग आहे. यामध्ये एकूण ३ तासाची जंगल सफरी असणार आहे.